GRACE樂園

GRACE的重要啓示!!!!!!

2008-01-12T11:24:00.000+08:00

各位好, 由於現在所用的這個blog 實在太沉靚, 我常常在想仍有人來嗎??????? ?? 所以在早前我已在 yahoo 建立了另一個blog, 因為那邊到訪的人較多, 較為有互動的感覺, 所以現在所用的這個[GRACE樂園]會暫減少便用, 不過我仍會間中將我的一些生活相片放在BLOGGER[GRACE樂園] 這個BLOG內, 為何我不將相片放在yahoo的blog內呢?? 是因為有點不好意思的感覺, 另外亦因為BLOGGER這個BLOG較小香港人便用, 所以放我的相片也應該不會有太多香港人看到, 哈...所以較為安心似的.
亦麻煩各位日後請轉到我YAHOO的這個BLOG [GRACE天地]逛逛及留言呀!!!! 不過想看我的近照就要到BLOGGER的這個BLOG啦!!!!! 希望不會麻煩到大家啦!!!! 我仍想繼續跟大家互動的!!!!
祝大家 2008年每一天都過得精彩, 快樂!!!!

絶育後的第二天

2008-01-11T14:11:00.000+08:00

今日阿寶o既情況又好o左d 啦. 見到佢食o既o野又多o左, 飲o水亦都多o左, 最重要係今朝見到佢有疴到大大, 雖然量唔多, 但係總好過無o野出. 仲有今日佢都多o左周圍走, 不過唔知係咪因為俾 d 繩紮住, 所以行路都係[呀]下[呀]下, 我地睇過佢個傷口都埋得幾好, 姑娘話三日左右就會好返, 所以我地都諗住聽晚就同佢除o左個燈罩, 相信佢一定會好開心, 不過阿寶個身好臭...應該係hang到d尿...好難聞呀, 不過都唔可以同佢沖涼住, 起碼都要過多一個星期, 等佢真係好返哂先可以同佢沖涼!!! 到時就臭氣全消!!!!

難涯o既一晚

2008-01-10T15:43:00.000+08:00

對阿寶o黎講, 尋晚應該係佢一生中最難涯o既一晚, 其實佢o黎我屋企之前, 佢都受過傷, 我諗有 d blog友都會留意到阿寶條尾係怪怪地, 其實佢係點樣整親, 我地都唔知道, 只係估計佢細細個o既時候同其他猫打交又或者俾猫打做成o既, 我諗果次o既受傷都會令到佢好痛, 但係點痛都唔夠今次[男人之苦]咁痛, 身體上重要o既寶貝俾人切o左....我地只要諗都覺得好痛啦, 何況係當時猫呢!!!! 另外, 下面痛到死之制, 上面又無啦啦多o左舊o野, 我係指佢個燈罩呀, 佢極之唔鍾意個燈罩, 佢都試圖整甩佢, 不過當然唔成功啦!!! d 麻醉藥又未散得哂, 迷迷茫茫, 又只係食 o左小小猫糧, 又無飲過水, 幾十樣o野一晚裡面發生哂, 唔好話一隻猫, 就算係一個人都好難頂啦!!! 所以我同我二家姐都陪o左佢好耐, o係佢隔望睇住佢訓, 盡量令佢覺得我地係錫佢, 係關心佢, 令佢唔使咁驚, 好好彩尋晚阿寶都吃訓到, 我聽我二家姐講, 阿寶半夜四點幾醒o左, 我二家姐俾o左小小o野佢食, 而阿寶亦小o左一次便, 之後又再訓過. 而我今朝七點幾就起身去睇睇阿寶, 我見到佢已經醒o左, 於是俾 d o野佢食, 可能真係好肚餓, 佢都即刻食o左d猫糧, 不過唔係食好多, 可能心情都唔係咁好, 無乜心機食, 之後再試下俾 d 水佢飲, 不過帶住個燈罩, 要俾水佢飲都有 d難度, 最係就用一條飲管拿拿俾佢飲, 不過佢都只係飲o左dd, 跟住又唔肯飲, 唯有每隔一段時間就俾 d o野佢食, 俾 d 水佢飲, 希望佢有返 d體力，　可以快　ｄ好返.

阿寶返屋企喇!

2008-01-10T15:28:00.001+08:00

我同我二家姐今日四點幾再出門去接阿寶, 無見佢七個鐘頭, 唔知佢點呢?? 好心急想快 d 見返佢. 我地五點半就去到診所, 診所入面都幾多人, 見到有人o係柜枱同姑娘講緊o野, 以我都只係企o係隔離等, 不過見佢地講咁耐都無理我, 所以我都急唔住走埋去問姑娘我隻猫猫阿寶係咪走得, 姑娘話係呀, 轉頭就將阿寶連猫帶袋拎出o黎, 當時只係見佢無乜反應, 姑娘話阿寶 d 麻醉藥仲未過哂, 過多陣就會醒, 跟住俾o左 d [抗身素]我, 要俾阿寶食架!! 仲話阿寶要過o左今晚九點先可以俾o野佢食, 俾水佢飲, 之後收埋我錢就走人啦... 我地坐輕鐵返屋企, 途中見阿寶開始醒醒地, 有 d 郁喇!!! 好快我地就返到屋企, 我第一時間開o左個袋睇下阿寶佢點, 佢醒o左啦, 不過仲係無乜力, 不過佢好想將個燈罩整甩, 我地當然唔俾佢咁做啦!!! 不過見佢係咁向後行, 行兩步就無力再行, 唉....初初都係放佢o係佢間屋度, 不過佢就唔肯入去, 之後就將佢放o係佢間屋上面, 佢就定返小小, 係咁 e 訓o左一陣, 不過轉頭醒返又要想整甩個燈罩, 由於我買果個燈罩大o左小小, 姑娘幫我用繩索緊穩佢, 所以阿寶變o左一隻帶住燈罩又成隻蟹咁o既猫, 真係好可憐!! 見佢行兩步又無力, 真係好慘, 今我諗佢都好難過, 不過我地一家人都會支持你o架寶寶, 你要堅強d 呀!!!!!!!!!!!!! 一過九點我就會即刻俾水同俾o野你食o架啦!! 你好快會好返o架啦!!! 加油呀!!!

向獸醫診所出發

2008-01-10T15:12:00.000+08:00

我地就係去呢間[東方獸醫診所.

由於姑娘話應幾日水晶沙就ok o架啦, 所以買包細就算啦.另外, 果包猫猫小食都係咁o岩見到順便買返俾阿寶食. 其實最初想買魷魚絲, 不過果間鋪頭無得買.

捐完錢就係送o左呢份禮物啦, 係clips o黎o架, 幾得意.

今朝月同埋我個二家姐一齊帶阿寶去獸醫診所, 由於由尋晚十點開始阿寶就要斷糧斷水, 所以今朝一早佢就鬼殺咁嘈, 不過你嘈都無用, 時關你到時要全身麻醉, 一定要空肚o架!!! 唔係拍做完手術係咁嘔呀!!!
今朝九點我地一行二人一貓向獸醫診所出發, 之前咪買o左個貓貓走鬼袋, 所以今次唔使坐的士去, 慳返幾十蚊,哈...阿寶全程車都好安靜, 只係間唔中郁幾下, 佢都唔知自己將步人貓生中另一個大轉變, 由有得生變無得生, 其實對於一個雄性o既動物或者人類o黎講, 係一件相當痛苦o既事, 我都唔係好忍心, 但係為o左佢將來會小 d 病痛, 同埋唔會搞大其他靚貓女個肚, 所以辛苦你啦...阿寶!!! 仲有聽人講貓貓做o左絶育手術會乖d o架, 我都希望會係咁. 言歸正傳先, 我地經過幾十分鐘o既車程終於都到o左診所. 由於事先已經預約o左, 所以一去到, 姑娘係咁 e 講o左做手術係有風險, 因為怕貓貓對藥物會有敏感, 不過都只會係好細o既風險, 叫我寫返低我 d 資料(應該係預防我放低隻貓唔要, 同埋唔俾錢!!, 因為要寫埋身份証),另外, 姑娘仲同我地講寶寶做完手術之後, 最好要用水晶沙o黎去大小便, 因為我唔係用開水晶沙, 所以要去買呀. 咁一切手續都做用就將阿寶交俾姑娘, 要等到今日晏 d 五點幾之後先可以去接返阿寶, 希望手術成功, 一切順利啦.
之後我同我二家姐就去 o左元朗逛o左一陣, 順便去買猫沙, 我地行行下有位女士走埋o黎, 原來係[拯救遺棄寵物中心] 做緊酬款, 真係有意思, 所以我都响應下先, 捐o左廿蚊, 諗住捐完就走啦, 點知果位女士話有小禮物送件送返俾我, 哈..真係又可以做善事, 又有禮物收, 好開心呀!!! 好似係為阿寶作o左個福咁呀!!! 真係好開心呀!!!
之後買o左水品沙同埋一包猫猫小食, 仲買埋我地o既午餐就返屋企啦. 再等多幾個鐘就去接阿寶啦!!!! 阿寶你要叻 d 呀!!!! 加油!!!!

阿寶過多十幾廿個鐘就會變[公公]

2008-01-08T18:33:00.001+08:00

聽日會帶阿寶去做絶育手術, 希望一切都會順順利利, 聽講 d 貓貓做o左絶育手術之後, 身體o既病痛會小d, 所以我都係佢好o架咋!!! 其實做完果幾日佢應該都會有 d 痛, 阿寶, 你要頂住呀!!! 一定要堅強d 呀!!! 加油呀!!! 做完之後都唔好周圍搞呀, 唔係整到個傷口發炎就死火啦!!! 記住, 要頂住呀!!!!

喬喬movie

2008-01-07T13:59:00.000+08:00

送上喬喬精彩短片兩大條, 請慢慢欣賞. 哈...

會唔會睇完唔敢生BB呀. 哈....

好有性恪

2008-01-06T21:36:00.001+08:00

今日約O左朋友O係屯門食晏, 佢就帶O左佢個[好有性格] O既姪女出O黎.

真係佢喇!! 佢叫喬喬, 佢真係超有性格, 點解我咁講呢.... 因為你叫佢做東佢就做西, 你叫佢唔好咁做, 佢就遍遍走去做, 你見佢影相, 佢雙眼十次有次都係唔望鏡頭, 呢張敢望鏡頭都係因為有O野利誘佢佢先敢望住個鏡頭定定地咁影張相. 佢長時間都係周身郁, 我個相機O既快門就唔夠快, 所以影O左好多張都係濛查查..唉..玩死我!!

低之後就俾 DＯ野佢做下啦!!! 因為佢Ｏ黎到可能好興奮，　俾　Ｄ　Ｏ野佢做下佢會定Ｄ．佢話佢畫緊隻手喎!! 似唔似就見人見至啦. 不過有時佢都畫得幾似模似. 以一個兩歲幾O既小朋友O黎講佢畫O野算唔錯啦!!

呢張相佢O係度自己接返條拉鍊, 好似好叻咁, 其實有人幫O既,!! 食飽之後佢不停咁唱歌, 唱到忘我O既景界, (遲D POST俾大家睇睇) 叫極佢唔好咁大聲, 佢都無理過我地, 唉..........其實佢想做O既想要O既O野佢一定會用盡方法要到, 你都咪話唔俾佢激死. 食飽我地就行去吉之島.

佢開始有 D 眼訓啦...

我地行到去吉之島, 見到有好多記者, 原來係仔仔同李冰冰O既電影[蝴蝶飛]做宣導. 於是係咁 E 都影返張相先. 仔仔真人無上鏡咁瘦, 而李冰冰都真係幾靚女過喎!!! 其實仲有幾個明星, 不過我只係識黃又南. 都幾多人O係度睇同影相, 仲有 D人大叫－仔仔，　仔仔〕，　我都過哂呢　Ｄ　追明星Ｏ既；階段，　企Ｏ係度八下就會，　走去追明星就ＮＯ．．啦!!!

喬喬都Ｏ係度睇，　不過我諗佢睇唔到個明星囉．．佢咁矯!!

之後睇夠就走人，　喬喬可能都有　Ｄ　眼訓，　開始有　Ｄ發老脾, 當時亦因為佢個姑姐, 亦即係我個 FRIEND去O左廁所, 佢要搵我個 FRIEND完全都唔理我, 仲話要返屋企想走人, O...NO...好彩我個FRIEND都好快返O黎, 拿拿聲放返佢上BB車, 之後我地再去O左屯門市鎮公園坐下傾下計.

無所事事就幫我地呢個倒影影O左張相. 哈....

跟住我地坐O既隔離就係條石春路, 我個FRIEND 話試下, 點知佢話好痛好痛, 我見佢咁痛, 我又好想試, 走路去行O左一陣, 我就唔係好痛, 哈...可能我個FRIEND肥過我重過, 所以受力D痛D啦!!

我地O岩O岩開始傾計喬喬就訓O左, 終於都好定可以俾我往影. 哈.... 跟住都坐多一陣都走人, 因為越坐越涼, 都係時候走人啦....

P.S. 開埋上一個文章講過我個膠碗同蛋糕模O既價錢.
登...登...登...登.......
膠碗 - 9蚊雞. 真係好平.
蛋糕模 - 25蚊. 都平呀!!

又執平O野!

2008-01-06T11:05:00.001+08:00

真係好平!!

呢個都平!!!

尋日約o左朋友去旺角行, 行行下見到有間叫[Clipper] o既鋪頭大減價, 於是入去逛逛啦!!! 其實都見到有 d 碟同碗想買, 不過 d size 好似唔係咁o岩心水, 最後都係無買到, 不過就買o左一個好大o既膠碗, 可以用o黎打蛋, 打忌廉o既時候用, 其實買唔買都得, 不過見到實在太平, 平到你唔想, 所以忍唔住都買o左, 大家估下幾多錢, 哈....
另外, 再行行下, 行到去花園街, 又俾我買o左個蛋糕模, 我都唔係第一次見到呢個模, 不過當時無買到, 今次又路經見到, 唉...都係買o左佢去啦!!! 係一個 28*14*6.5cm o既蛋糕模, 大家又估下幾多錢. 哈...

阿寶都頂我唔順, 哈...

2008-01-04T18:26:00.000+08:00

阿寶以為自己好醒

2008-01-04T14:48:00.000+08:00

阿寶: 好悶呀....

寶: GRACE, 你估下我O係邊度, 你睇我唔到, 你睇我唔到..
GRACE: 有乜理由會睇你唔到呀....

寶: 咁耐O架....有冇O黎搵我架..???
GRACE: 搵到你啦.............

寶: 都唔好玩O既...

吞拿魚蘑菇沙律包

2008-01-03T18:26:00.000+08:00

吞拿魚蘑菇沙律包

天氣凍o既關係, 麵包發酵o既時候亦耐好多.

第一次發酵完就分成八份.

將吞拿魚沙律醬加入.

焗好啦.......

好好味呀~~~~~~~~~~~~~~~~

好耐都無整包包啦!!!! 天氣咁凍, 真係想食返個熱辣辣o既包包!! 見屋企有蘑菇, 又有吞拿魚, 所以就整個蘑菇吞拿魚包食下啦!!! 可能天氣實在太凍, 第一次發酵個包發o左成個幾鐘頭至發完, 平時天氣熱o既時候九個字至一個鐘乜都發完啦!!! 第二次發酵又係比平時半個鐘頭再要發多兩, 三個字, 真係等到我都發[毛]啦!!! 之後都係照平時咁去做啦!! 最後焗出o黎都好滿意!!! 一出爐我都急不及待食o左一個, mm.....好味道呀!!! 雖然出街買話咁快就買得到, 又唔辛苦, 又乾手淨腳, 不過無滿足感呀麻!!! 所以辛苦 d 都值o既!!!

麵糰做法：
高筋粉 270克
糖 30克
酵母４克
牛奶 110克
牛油 20克
奶粉 8克
蛋大o既半隻
湯種　80克(70克熱水加15克高筋粉拌勻待涼即可使用)

吞拿魚沙律：
吞拿魚　大鐵罐　－　只用ｏ左半罐
洋大蔥半個（切粒炒熟）
沙律醬　適量
蘑菇　適量
吞拿魚沙律做法：
將洋蔥切粒炒熟放在大碗內，　將吞拿魚倒入，　再加入沙律醬拌備用．

包包做法：
１）　將牛奶，酵母和五克糖放在一起拌勻待五分後用．
２）　高筋粉篩好加入餘下ｏ既糖，　奶粉，　湯種，　酵母奶，　蛋，拌勻，　然後搓，　搓至唔黏手及有彈性. 然後將牛油加入再搓一會, 跟住將麵糰放入已掃油的盆內,再蓋上保鮮紙發酵６０－８０分鐘.)（因為天氣凍，　所以時間會較耐）
3) 取出麵糰壓平切開八份(每份約60克), 　放在紙模上，掃上蛋漿，　將拿拿魚沙律加入．　蓋上保鮮紙第二次發酵，　大概發酵３０－４０分鐘．（亦因為天氣凍，　所以發耐ｄ）
４）　在發好的包包表面唧上沙律醬或芝士條．
５）　焗爐先以２００度預熱．
６）　將包包放入爐焗１０－１２分鐘．　（包包表面金黃就完成．

封信子

2008-01-02T13:53:00.000+08:00

12月14號去睇醫生O既時候見到花鋪有個阿姐賣緊[封信子], 見到好似幾靚咁, 每個頭賣18蚊, 見個阿姐擺出O黎果盆D花開得好靚, 所以我同我阿媽見到都覺得幾靚喎, 所以我都買O左一個頭, 當時果個阿姐話三個星期後就會開花O架啦, 其實早兩日我已經見 D花開哂，都好靚Ｏ架，　仲有一陣陣Ｏ既清香，　早知果日買多一舊啦!! 　果個阿姐話呢D 花一年開一次, 開完呢一次之後, 可以將個頭收埋去, 等出年再浸水到時會再開花, 我同我阿媽都好懷疑, 心諗有冇咁神奇呀!!! 不過唔理啦, 見 D 花都幾靚照買O左佢啦. 　話咁快唔使三個星期都已經開花啦，　又唔難種，　又方便，　有興趣Ｏ既朋友都可以買Ｏ黎種下

覆診

2007-12-31T21:38:00.001+08:00

今日要去 QE 內科覆診, 不過今日都等得比較耐, 其實我都排得好前O架啦, 我排第三個, 心諗應該都好快到我啦, 點知第一個入去人入O左去見醫生, 但係差不多一個鍾意先至出返O黎, 真係等到悶哂, 不過QE呢位內科李醫生真係好好O架!!!! 對病人好細心, 好關心病人, 真係好好, 好好. 之後第二個入去覆診Ｏ人都入Ｏ左去20分鐘, 終於都到我啦!!! 入到去見到李醫生, 都同醫生問返上次抽 DＯ野去驗，　報告出Ｏ左未?醫生睇過之後佢話一切正常，我個心都定D, 不過我都同醫生講, 我都仲係間唔中覺得個肚某一個位成日都會隱隱作病, 醫生見我咁講, 亦因為我之前個病又比較少見, 所以都安排我再去照腸, 不過都要排到去08年6月, 政府醫院係要咁耐O架啦, 無法啦!!! 不過醫生都叫我留意期係咪仍然成日病, 佢都安排出年五月去覆診, 到時再問我 D情況會係點，我都希望一切正常，樣樣都無事啦!!
覆完診之後就出Ｏ左去尖沙咀，　因之前續Ｏ左電話Ｏ既合約，　電話公司送Ｏ左　Ｄ禮品, 所以要去拎囉!!! 不過我都好耐無出尖沙咀, 去到都要問下人, 不過都好快搵到, 可能今日係元旦, 果間禮品換領公司朝早無開, 要到下午一點先開工, 我十二點幾去到, 都等O左差不多半個鐘先拎到果 D 禮品, 份禮品係 HELLO KITTY O既雙人冷氣被, 都OK O既, 好過無咁囉. 之後換好就拿拿聲去食晏. 今日家姐一家人都O黎屋企食飯, 不過佢地食完飯坐多一陣又再出元朗, 真係忙. 好啦,
07年即將過去, 祝大家08年個個都身體健康!!! 笑口從開!!! 日日都咁開心!!!!!!!!!! HAPPY NEW YEAR!!

睇醫生

2007-12-29T11:11:00.000+08:00

尋晚食完藥之後, 到今朝仍然係無乜好轉, 所以今朝一早九點幾就走去睇醫生, 其實以前會出返去屯門睇返睇開果個醫生, 但係實在唔想去咁遠, 所以去返屋企樓下商場度睇就算啦.. 商有三間診所, 一間休息, 另一間就鬼影都唔見多個(無客), 另一間就見有四, 五個人o係度等緊, 所以都係去間有人睇o既好似穩鎮d.
見到 d病人個個都ｏ係度咳，　我諗都係感冒o架啦. 可能呢排 d天氣轉啦，　所以特別容易病．　我坐o左都唔使十分鐘就有得見醫生啦. 不過都係好求期問幾句, 有邊度唔舒服, 聽下個背脊, 問下有冇藥物敏感, 最後就係話食飽先好食藥, 之後就等攞藥囉.
由於今日約o左去朋友屋企大食會, 所以我都唔敢食醫生開果 d 藥, 我怕食o左會好眼訓, 都係食依 d 成藥先, 等玩完今晚返屋企先食醫生果 d 藥啦.

大傷風

2007-12-28T20:01:00.000+08:00

開始作病, 又流鼻水, 又有 d 咳, 又有 d 啖, 食o左 d 成藥, 不過都仲未好, 睇下聽日情況點, 都係麻麻就去睇醫生. 唉....都係要洗下錢先至會好返. 聽日仲約o左去朋友屋企大食會, 睇o黎都要帶定個口罩先至得啦...我都唔想傳染我 d 朋友, 尤其是係朋友個 BB呀. 所以希望聽日會好 D 啦.

聖誕打邊爐

2007-12-27T12:50:00.000+08:00

尋日約O左朋友去佢屋企打邊爐, 我地一行數人先去元朗買打邊爐O既食物. 買呀..買呀..買.....買好之後就再坐車去好友屋企. 去到都黃昏啦..

之後我地放好哂 D O野之後, 好友話佢屋企果頭有個跳蚤市場, 所以我都就再行去望望.
RMHER
途中見到仲有一 D 好舊既磚門.

又見到個井, 不過唔知仲有有用??

呢張好似返O左鄉下.

到啦...到O左個跳蚤市場啦, 不過入面無乜O野睇, 我都都係O係度 E 行下就算啦. 逛完就返去好友屋企.

同下芷澄影下相.

芷澄表演緊俾我地睇.

打邊爐...當然唔係得咁小O野食啦.

我地今年仲搞埋交換禮物, 我都好多年無玩呢 DＯ野．

其中一位朋友抽到呢對HELLO MIMI O既喇叭, 好靚O架. 我都好鍾意呀, 不過我抽唔到...-_-

我就抽到呢樣, 係咪好靚呢!!!!!

其實係抽返我自己果份.....哈.....好靚O架!!! 真係禮自用都VERY GOOD.

聖誕寶寶

2007-12-24T12:32:00.000+08:00

寶寶話要同大家, 仲有貓地講聲聖誕快樂喎!!! [喵...喵...喵...喵......] 我地聽唔明o架啦, 貓地應該聽得明!!!!

元朗西鐵燒烤樂園

2007-12-23T22:15:00.000+08:00

今日約O左同學去元朗燒O野食, 原本 TOTAL係八個人O既, 點知去到元朗收到同學O既通知有一個O黎唔到, 唉...點知仲O係度等緊佢地O既時候又收到電話, 又有一個同學有事O黎唔到!!! 係咪玩O野呀!!! 當時只有我一個O係元朗O既西鐵站, 心諗唔好仲有電話O黎話有事O黎唔到呀!!! 好彩之後果幾位同學都應約O黎到.

去到之後, 落緊毛毛細雨，不過由於其中一位同學已經預早ＢＯＯＫ　Ｏ左位，　所以去到現場，　我地坐果個位係有蓋Ｏ架，　所以就算再打Ｏ野雨都無問題．我地坐低Ｏ左之後就馬上去拎用具同Ｏ野食．　由於我地約得早，去到都只係得好少客人．　今日天氣涼涼地，　所以燒起上Ｏ黎都好舒服．　

呢間燒烤場 D O野食都OK, 唔會太咸, D O野食都夠味, 不過我地拎O既O野食當中以牛油法包係最受歡迎, 其實係最受其中一個同學個女O既歡迎, 因為佢人仔細細, 一個人食O左八塊牛油法式包包, 雖然個包包細細件, 但係食到八塊真係好勁.

我地由兩點左右開始燒, 一直燒到六點左右先至走, 入夜O既時候客人都多O左好多, 相信再夜D會更多人呀. 由於今日都要好大聲講O野, 所以返到屋企把聲都沙沙地呀. 返到屋企要諗 D蜜糖水先得呀．　

走Ｏ既時候都同同學個仔影返張相先．　哈．．不過影得麻麻地．　

與阿寶對話

2007-12-20T09:36:00.000+08:00

尋日見阿寶訓緊, 諗住走埋去同佢影下相啦, 點知佢都唔係訓, 扮哂o野, 哈... 我問佢係咪乖, 佢都識得用條尾話我知佢好乖, 哈...但係我問佢有冇曵佢條毛就無乜點郁, 哈.. 總之就贊佢果 d 佢就受哂, 話佢果d就扮聽唔到囉. 哈.. 有時對住佢都唔知好嬲定好笑.

第三日拎O野去診所

2007-12-19T14:42:00.001+08:00

今日又要拎 DＯ野去診所，　不過拎埋今次就唔使再拎啦．　希望CHECK出O黎O既結果係正常, 無事啦!!!
之後行O左去寵物用品點度睇下 D猫猫用Ｏ既袋，　因為都無一個正正式式放猫猫Ｏ既袋，　另外，　亦因為下個月就會帶阿寶去做絶育手術，　所以都係要買個袋到時用．　　初個sales 介紹Ｏ左一個袋俾我睇，　個款都幾靚Ｏ架，　不過要二百幾呀，　貴Ｄ　Ｏ者，　因為Ｏ呢個袋都應該唔會成日用，　我諗一年都唔知用唔用到一，　兩次，　所以都費時買太貴．　最後就買O左呢款袋囉!! 哈...平 D呀麻．　不過都差不多要一舊水Ｏ架．我要求唔高, 唔使 D靚到爆Ｏ既款式，　所以是旦啦!!! 　阿寶，　阿寶，　你就快要受一力啦，　你要堅強　Ｄ　呀!!!　哈．．

第二日交ｏ野去診所

2007-12-18T17:11:00.001+08:00

今日又要再拎 d o野去診所, 所以十點就出o左屯門喇!! 將 dｏ野交低之後就行ｏ左去吉之島逛逛．又行o左去十蚊城, 買o左兩個保溫袋, 雖然個樣就唔靚, 不過諗住方便第時拎 d凍餅俾朋友試ｏ既時候可以用，其實都未試過，　所以都唔知可以ｋｅｅP 到幾長時間，　會唔會拎到去朋友屋企個蛋糕已經溶哂呢?? 呢個仍然係一個迷，　要到時試過先至知道．　跟住再買ｏ左一罐紅豆，　亦都係for下次整o野食o既時候用o既!!!(屋企仲有一罐, 所以唔買咁多) 之後去o左白佳買糖霜, 事關我屋企附近果間惠康都無糖霜買, 真係麻煩, 焗住要去百佳買, 而我屋企附近亦都係無百佳o架, 最近果間都係要坐車先至到, 如果行o既話, 行大半個鐘應該會到, 所以有時出開去, 路經有百佳o既話, 我都會順便買埋.
買完o野就要返屋企商場買餸, 事關阿媽返o左大陸, 要煮飯俾老豆食呀. 由於呢幾日都,要口, 所以諗買 d 乜o野餸都好煩. 最後都係買o左菜, 魚同豬扒, 簡簡單單, 因為難果 d我都唔係好煮!! 哈．．．

多謝家姐

2007-12-17T21:12:00.000+08:00

今日買o野聖誕禮物. DIY果兩份係家姐送俾我O架. 多謝家姐.

家姐買俾我O既糖, 哈...

呢支俾我二家姐.

家姐買俾我, 阿媽同二家姐O既, 再多謝, 多謝!!

今日要交 D O野去診所, 交完之後就約O左家姐食晏, 我地食飽之後就去O左吉之島買O野, 因為要買聖誕禮物, 聖誕都就到喇!! 仲唔去買就買唔切O架啦!! 好彩都俾我買到, 我自己就好鍾意喇! 唔知到時交換禮物時, 要O左我份禮物果個朋友鍾唔鍾意呢 ? 哈...
另外行行下見到有 D O野得意, 我同我家姐都覺得兩個姨甥女應該會鍾意, 所以就買O左俾佢地一人一份. 不過係 D　ＤＩＹ　Ｏ既玩意，好大可能最後都係我家姐幫佢地搞. 哈. 辛苦你喇..家姐!! 而家姐都買O左兩盒 DIY O既公仔俾我, 到時等佢O黎我屋企就一齊整, 真係開心, 多謝家姐!!! 另外, 今日家姐都俾O左D 護膚品, 沐浴露俾我地, 又要再講多聲, 多謝家姐, 再跟住, 家姐又俾O左一支糖我呀, 哈....呢支糖係佢早排去元朗O既戲柵見有個阿伯O係度整糖公仔, 佢見好得意, 所以就買O左俾我同我二家姐, 其實呢 D 糖O係我地好細個O既時候都食過, 不過幾耐之前就唔好講啦,因為真係好耐. 一見返呢支糖就好有懷舊FEEL, 好似返返去好多年前咁, 果陣時乜都覺得好食, 年紀細呀麻, 乜都唔識, 樣樣都覺得好. 依家人大O左, 睇見呢 D 陳年O野就特別有味道!! 家姐真係好有心, 成日都買O野俾我, 再講多次, 多謝家姐, 哈...

睇醫生

2007-12-14T18:30:00.001+08:00

今日我同我阿媽都要睇醫生, 我就因為個肚成日都痛痛地, 所以去check 下乜事, 而我阿媽就係睇眼, 由於我以前 d腸出過問題，　所以我自己都有d 擔心, 今日見o左醫生, 醫生都話要我拎 d 便便再去 check check, 唉... 有 d 憂慮.... 希望無事啦. 而我阿媽睇完醫生, 暫時都無乜大問題, 只係話雙眼有 d發炎，　要多　ｄ清潔眼睛, 不過都會同佢 check 下有冇青光眼, 同樣都希望阿媽無事!!!

o黎緊呢五日, 即係星期六, 日, 同下星期一, 二, 三都要戎口, 只可以食菜心, 雞肉, 豬肉同魚肉, 另外生果就最好只係食橙, 為o左可以check 清楚, 清淡 d 都要, 最緊要係無事.

又係佢呀 - 綠茶紅豆芝士凍餅

2007-12-13T22:59:00.000+08:00

果日整果個失敗O既日式芝士,蛋糕, 仲有 D 忌廉芝士未剩, 所以今日用埋佢, 我最鍾意就係食綠茶紅豆之士凍餅, 所以就用佢O黎整呢款,蛋糕啦!!! 其實都整過幾次, 如果有睇開我個BLOG O既朋友都睇過幾次. 材料同做法, 大家可以去返呢度睇返.
今次整完一樣係咁好味, 正. 不過掛住影相, 個蛋糕都溶溶地...哈..

白行

2007-12-12T20:22:00.000+08:00

日原本係book o左去屯門門診所睇醫生, 點知無帶身份証, 去到無得睇, 我成世人都係第一次唔記得帶身份証....唉.... 事原係咁o既, 早兩日我去o左跑步, 每一次去跑步我都費時帶銀包, 只係帶身份証去跑就算數, 咁我個身份証會放o係個褲袋度, 跑完步之後就拎條褲去洗啦, 但係又唔記得拎返個身份証出o黎, 咁最後當然濕哂啦. 我就抺乾個身份証之後連埋個身份証個套放o左o係個電腦枱度, 又唔記得放返入銀包度就出街啦....去到診所先記得無帶身份証, 唉...........當然係無得睇啦. 我真係老人痴呆..........唉...橫掂我阿媽星期五都要去睇眼, 到時再一次過去睇埋啦...
之後無得睇醫生, 就約埋我家姐同姨甥女去逛逛, o係吉之島見到有有d 扭蛋幾得意, 係d迷你假盆栽, 心情唔係太靚, 所以就走去扭兩扭囉. 俾大家睇睇, 都幾得意o架. 放o係電腦隔離都幾靚o架.
去完扭蛋之後再去o左十蚊城度睇下有冇o野買. 逛o左一陣, 買o左個迷你o既平底鑊, 同埋一式兩個o既用具, 係用o黎將d 已經煮熟o既雞蛋由圓形整成心心形同星形, 見到咁得意就買埋佢. 果個迷你o既平底鑊係方便有時想煎一隻蛋o黎煮麵時候用又或者整蛋治o既時候用, 唔使開隻大鑊o黎用咁麻煩.

放o係電腦隔望都幾靚o架. 個一毫子係做對比架.

10蚊雞, 好鬼底.

整o左出o黎係咪好得意呀!!

2007-12-11T21:26:00.000+08:00

今日試整日式芝士蛋糕, 不過失敗O左, 睇相果個蛋糕好似得得地咁, 其實係唔得O架!!!!!!!!!!!!!!!!!!!!! 個蛋糕入面焗緊都焗唔熟, 唉.....我已經焗完再焗, 跟住又再焗, 但係都係唔熟, O...NO.......最後當然係糕沉垃圾筒啦!!! 其我已經係第二次試做日芝土蛋糕, 上次衰得更緊要, 今次起碼都見到個蛋糕形, 上次無形可言, 唉...點解呀?? 錯係邊度呢??? 係咪同我無緣呢?? 我好怕我下次再整又失敗呀 !!! 唔好玩我啦!!! 唉.. 無心機呀.

阿寶心情好

2007-12-10T20:35:00.000+08:00

阿寶今日都係無乜入佢間屋, 我就引下佢, 佢可能心情好啦, 都有入去佢間屋度玩. 不過大家留意下佢o既眼神, 好鬼黑人憎, 好似覺得我好煩咁, 哈...同你影下movie o者, 使唔使咁o既面口呀!!! 話哂你新居入伙, 拍低下做個紀念o者. 第時等你得閒可以睇返, 你話幾開心啦. 係咪!!

神棎 , 阿寶新屋

2007-12-09T23:27:00.000+08:00

今日約o左好友睇[神棎], 我之前都有個朋友睇o左, 問過佢話幾好睇, 所以今日就去睇啦!! 套戲都上o左一段時間, 所以今日去戲院買飛一 d都唔難，　套戲節奏都幾快，　一　ｄ　都唔悶，　不過由於人物比較多，　故事錯綜複雜，　有好多地方都要諗．　主角劉青雲做得好好，　睇落去佢呢個角色真係好似有　ｄ　神精錯亂，　行為有ｄ古怪，　成日都話佢睇到人地心裡面ｏ既鬼，　另外，　故事裡面頭頭尾尾出現ｏ左三個佢ｏ既老婆，　一個係佢以前ｏ既老婆，　一個就係依家ｏ既老婆，　另一個就係佢諗出ｏ黎ｏ既老婆，　其實真係好迷惑，　等套戲出ｏ左vcd再睇多次先至得.

睇完戲之後, 行過街邊見到有小販賣貓貓狗狗用o既屋仔, 我見咁平都買o左一間俾阿寶呀. 哈... 之前阿寶住緊果間係我老豆自製o架, 係用紙皮箱做o架. 哈...我阿爸乜都鍾意自己整o架. 拎到返屋企阿寶一見到就一支箭咁走入屋裡面, 哈... 我家姐抻隻手埋, 佢即刻發惡呀!!! 嘩...真係惡得佢呀! 但係玩o左無耐就無o係果間訓, 唉...希望唔會再唔入去訓啦...唔好玩o野呀!!!!! 細佬!!!

不過間屋好似買得大得制.....哈..

流浮山之旅下集[水邊圍]

2007-12-09T22:48:00.000+08:00

尋日講到去o左流浮山睇日落, 睇完之後我地就坐巴士去元朗食晚飯, 初初諗住泰良苑食, 不過後尾其中一個friend話水邊圍有間泰國菜館都好好味, 所以我地就轉架部, 不過可能太攰, 我個friend帶我地去到果間菜館, 我一路都無留意間菜館個名, 所以我唔知間o野叫乜名, 一心就諗住快 d 有得坐就好啦...

呢個蝦刺生都幾好味.. d 蝦都唔會太細條, 個汁都好味o架.

豬頸肉ok啦.

泰式鳯爪都ok.

芝士蝦丸, 差 d俾ｄ熱到溶哂o既芝士[辣]親, 呢個蝦丸都幾好味o架!!!

呢個咖哩海鮮包就普普通通啦, 個麵包唔係好得.

唔好意思, 我唔知呢個係乜o野炒飯, 因為係 d friend點, 而我自己亦都係無留意.

呢個冬蔭公湯好好味, 好有蝦味!!! 唔會得個酸同辣o既味.

呢款就麻麻地.

最後呢個椰汁糕, 食咁多次椰汁糕, 呢間都算係差喇!!! 個樣就好大路囉, 但係味道麻麻．

食飽飽之後，　無意之間望到菜館入面放ｏ左一個神壇．個神壇上會擺放ｏ左好多唔同ｏ既神像，　但係其中一個．．．．．...[最左手面困個]．大家唔好介意，　係一個男性陽具，　我同　ｄ朋友都好好奇!!!! 究竟係拜乜o既呢???? 大家個好多個問號???????? 不過都無諗住問菜館o既人, 廢時啦..唔知人地會唔會唔鍾意. 所以我地無人問. 但係就成為一個迷囉!!! 大家有冇見過呢?? 有冇人知係拜d 乜o既呢?

我地食飽飽就行去搭西鐵. 因為大家都好攰喇!!! 要返屋企休息!!! 下次唔知仲會唔會去邊度行呢?? 其實要我地周圍去都係比較難, 因為都唔係好願行. .哈...

而呢兩件衫就係好友 connie 尋日俾我o架. 多謝佢先!!! 兩件都o岩o岩好, 如果我肥少少都唔岩o者呀!!! 哈...多謝, 多謝!!!

呢 d 就係尋日買o既o野啦!! 不過都唔買o左好多. 包括兩支蠔油, 一包米通, 一包炒米餅同埋半斤蠔屎.

流浮山元朗萬無目的一日遊上集

2007-12-09T09:47:00.000+08:00

尋日約O左幾位好朋友去O左流浮山行下. 我地首先O係元朗醫肚先. 我地去O岩元朗廣場隔離O既一間大排檔食粉麵.

我O既雲吞河.

另外兩位好友都係叫牛雜河, 另外仲有一個朋友唔肚餓無叫O野食.

我地仲叫O左炸魚皮. 好脆O架.

同埋油菜一碗.

食飽飽之後就坐 K65巴士去流浮山啦. O係總站落車.

去到流浮山就去睇下 D海味．

有蠔屎，　蝦米，　蝦乾, 咸魚等等．．．

另外都有　Ｄ小食賣.

行完一輪, 我地就行到去露天O既地方, 見到好多蠔O係度哂緊太陽.

亦見到有 D阿太O係度開緊蠔. 大家望望右下角果筒就係開O左出O黎O既蠔啦.

已將取出蠔O既蠔殼.

行行下見到地下有一條已經哂得乾乾地O既魚.睇到佢個咀, 佢應該唔係哂死, 係缺氧死O既. .哈...

途經好多魚檔都未開工. 好靚.

之後我地行O左去食O野. 呢碟係炸生蠔同炸油池. 兩樣都好好味.

另外亦一人叫O左一碗豆腐花, 豆腐花都好滑, 不過無豆味.

食飽飽之後, 我地就去搭車上[下白泥]睇日落啦.

行O既時候見到 D 掛住O既魚乾, 你睇幾得意.

我地千辛萬苦先去到下白泥, 因為我地最初上網睇D資料, 見有人話可以行路行到去下白泥, 點知係搵苯O架, 我地O係流浮山問過人, 其中一位阿姐話行唔到O架, 如果行就有排行呀, 叫我地搭車去啦, 我地初初諗住搭小巴, 不過等O左一輪都唔見, 所以就坐的士, 點知坐的士都坐O左三十幾蚊, 嘩....如困白白痴痴行路去, 唔知天黑到O左下白泥未.

雖然我地最終都去到下白泥, 不過都唔識路, 行下行下又係CONNIE行到去目的地喎, 哈...

其實呢度都只係一個釣魚場, 要再行入 D 先到要到O既地方.

大家見到嗎...日路喇!!!! 真係好靚.

我地繼續行呀, 行呀. 見唔見我地一包二包, 都係之前買O既海味呀, 小食呀. 哈...

行到去下白泥啦. 由於已經開始水漲, 所以睇唔到更靚O既場呀. 可惜~~

o黎到當然要影返張相先啦.

O係沙灘度留返個大名先.

水漲啦...D 水已經蓋過 D 雜草啦. 我地都要走啦...

回程O既時候, 見到好多已經枯死O既雜草.

又返到去釣魚場啦.....O係流浮山O既行銷完畢, 之後我地就去O左水邊圍食O野, 下回方解.

BROWNIES & 板前

2007-12-06T11:45:00.000+08:00

講返[板前]先, 之前聽我 d 同學講話都幾多人等位, 所以我地都約o左好早六點15分到, 不過間o野好老土, 一定要所有人到齊哂先俾位, 好彩我 d 同學六點半o岩o岩到齊, 我地都好快有位坐. 間鋪頭環境都幾好, 坐得都好舒服. 我地拿拿聲點o野食, 後尾 d o野o黎到, 味道........普普通通, 真係好普通, 賣相都ok o既, 價錢當然會比元氣貴dd啦, 不過元氣好似仲好食 d 喎!!! 我地試過之後都應該唔會再o黎試, 哈... 因為真係不外如是囉. 仲有尋日我好同學CYAN 因為O岩O岩去完日本玩, 買O左手送俾我地呀, 我抽到果份係 DKNY O既手巾仔呀, 好靚O架!!! 真係多謝哂. 就當我呢個 [BROWNICE]係回禮啦, 哈...
P.S. 我個BROWNIES 係跟呢個網做O架.

12月的寶寶

2007-12-04T10:40:00.001+08:00

話咁快又踏入十二月啦. 阿寶又大過子少少啦. 不過好似變得感性o左, 多愁善感o左, 間唔中鍾意望o下窗, 佢o係度諗緊乜呢? 諗緊今晚食乜餸?? 定幾時有新玩具玩呢?? 阿寶一定會話我點會咁無深度, 佢話佢係諗緊葉太點解會輸呢? 午餐肉含致癌物質, 咁猫糧又有冇呢?梁朝偉會唔會同嘉玲結婚? 投名狀又好唔好睇呢? 真係好多o野諗............其實都係無謂o野!! 哈... 不過最無謂又無聊果個應該係 GRACE囉

芝麻包

2007-12-03T19:48:00.000+08:00

o岩o岩新鮮出爐.

之前都整過芝麻包包, 今日其實唔係想整呢款包, 但係一時間又諗唔到做乜好, 所以好求期咁整O左個芝麻包就算啦. 真係好無誠意...其實我係想整蛋糕o架, 不過 d 低筋粉用唒, 又唔係好願出街買, 所以咪無得整囉, 但係又好想整 d o野, 咁咪......[唔使解釋啦.

整o左聽日可以當早餐呀麻. 呢個算唔算係理由呀!!! 查實整完都即刻切開佢, 加o左 d 芝士呀...火腿呀...生菜呀...蕃茄呀...落去, 食o既時候都唔覺得好誇, 不過影o左相放上blog度, 睇落去就好似好誇咁. 其實我都唔大食o架咋...(又解釋) 只係想錦上添花o者. (自己握自己)

搵日真係要去入下貨先得, 唔係到要整o野o既時候又乜都無呀!!

2007-12-02T07:26:00.000+08:00

麥記生日大紙板一個.

大人小朋友寫俾朗朗o既生日卡

喬喬都玩得好開心

呢個小朋友抽到禮物呀!

玩遊戲o既情況

喬喬同兩個表姐一齊影返張相先

朗朗 - 生日快樂呀!!!!

許返個生日願望先

許o左乜o野願望呢??

一家三口影返張合照先

o黎多張大合照

尋日係好朋友o既侄仔生日, 其實好友o既家人我全部都認識, 所以好友o既弟婦請埋我去佢個仔o既生日會. 依家 d小朋友搞生日會十個起碼有八個都係ｏ係麥記搞，　而好友ｏ既侄仔都唔例外．　好友ｏ既侄仔朗朗今年六歲，　佢媽咪就幫佢迎請ｏ左ｄ同學仔，　個個都得幾歲大，ｄ爸爸媽媽又幫佢地扮到靚仔靚女，　　都幾得意ｏ架!!! 　ｏ
我同好友ｏ黎ｏ既時候，　已經見好友ｏ既屋企人到哂, 仲開始食緊ｏ野，我都叫個包食先. 之後無幾耐就見麥記o既哥哥仔開始搞呢個生日會啦!!! 同 d 小朋友, 家長一齊玩, 呢個哥哥都搞到d 氣氛, 大人小朋友都玩得好開心, 而我就將呢個咁高興o既時刻照底落黎. 玩完一大輪之後, 就切蛋糕啦!!! 依家 d小朋友真係幸福，　又有生日會搞，　又有大蛋糕，　諗起自己細個ｏ既時候，　阿爸買件新衫俾我已經開心到不得了!!!

麥記哥哥帶領住 d 大人小朋友一齊唱生日歌, 朗朗許完願, 切完大蛋糕, 大家就開始食蛋糕啦, 之後就再影下相啦!! 不知不覺呢個半鐘就過去啦, 見 d 小朋友個個都好開心咁返屋企. 而我 d 好友就當然要拿拿聲執埋 d 禮物返屋企啦!! 因為要交返個場俾麥記啦!!!

o係呢度都祝朗朗生日快樂, 身體健康, 每一日都開心快樂!!!!

有消息喇!

2007-11-29T18:27:00.000+08:00

今日屯門眼科醫院打o左電話o黎喇!! 依家安排o左我阿媽12月中再去見醫生呀!!! 實在太好啦....如果要等到09年先見醫生就真係發霉啦..!!

同媽去睇醫生

2007-11-27T18:01:00.000+08:00

家姐同阿媽果兩碗湯粉唔記得影....

今日同阿媽去睇醫生, 因為之前佢覺得隻眼睇o野有 d怪怪地，　其實一早都叫佢去睇，　但係又話好忙，　又話要ｏ係佛堂幫手，　所以今日先至去睇，　去到醫生幫佢睇睇對眼, 我見醫生關o左燈用支o野照佢隻眼, 不過個醫生都照o左好耐.... 果刻我有 d 懷疑個醫生識唔識?? 之後個醫生話我阿媽講o既情況可能係視網膜o既問題, 幫我阿媽轉介去眼科果邊. 跟住我就同我阿媽去排期, 不過排期排到09年....仲要係8月, 不過個姐姐仔話睇下到時會唔會通知早 d 去見醫生, 所以暫時未知係咪真係要等到09年!! 不過我估多數都唔使咁遲o既!!
睇完醫生之後就約埋我大家姐一齊食晏. 我地去o左華都新開o既一間食越南o野o既鋪頭食, 間o野叫[西貢星], 因為我地都未試過, 所以就去試試啦. 不過我阿媽同大家姐叫果個湯粉都話好多味精又好咸唔好食, 而我叫果個海南雞飯就無乜o野. 另外叫o左客春卷, 都ok o既. 但係家姐話下次都唔會再o黎食, 佢話唔好食. 哈... 食飽飽之後就周圍逛, 我地由華都開始行, 中間行o左華都, 吉之島同新墟, 我地都買o左好多o野, 拎到手又攰, 腳又攰, 之後返到屋企阿媽即刻走o左去訓覺!!! 其實我都都好少三個人一齊去行齊齊, 所以今日雖然行得攰, 但係都行得好開心o架.
希望阿媽對眼無事啦!!! 最緊要個個都平平安安, 身體健康!!!

火腿香蔥包(湯種)-附食譜

2007-11-26T20:30:00.001+08:00

今日想做包, 又唔知整乜包, 諗諗下不如整火腿香蔥包, , 於是就行動啦... 不過唔知係咪天氣涼..個包都發O左好長時間先發得起, 好彩到最後都幾滿意落去好香O既蔥味, 不過如果再加多D多D多D蔥就更加正.

材料:
高筋粉 270克
糖 35克
酵母 5克
牛奶100克
奶粉 8克
蛋半隻, 另外半隻留返o黎掃包包表面)
牛油 20克
湯種 80克 (高筋粉 15克, 滾水 70克)

火腿, 蔥, 芝麻由自決定, 鍾意食幾多就落幾多啦.

做法:
1) 將五克糖, 酵母加入奶中待五分鐘後用.
2) 高筋粉蒒好再將糖, 奶粉, 湯種, 蛋, 牛奶酵母拌勻再搓至不黏手及有彈性. 然後才將牛油加入再搓一會, 跟住將麵糰放入已掃油o既盆內,再蓋上保鮮紙發酵45分鐘.)
3) 取出麵糰壓平切開八份(每份約60克), 加入火腿, 蔥做型, 掃上蛋漿, 再加入芝麻, 然後再放o係盆內, 再蓋上保鮮紙作第二次發酵.
4) 第二次發酵完成之後, 將焗爐以200度預熱十分鐘.
5) 麵糰用200度焗10分鐘. 完成.

多事之sunday

2007-11-25T22:41:00.001+08:00

今日家姐過黎我地屋企食飯, 我地約O左去食晏先. 都係去返我屋企商場入面果間[七褔神]食飯.

食飽之後就返屋企整曲奇, 不過今日真係超失敗, 整乜都失手, 唉...整到無心機, 原本我係諗住即唧花曲奇, 點知唔唔知係乜材料搞錯O左, 麵粉落多O左, 搞到整唔到唧花曲奇, 靈機一觸, 不如整蛋撻啦...點知又唔知邊度搞錯, 焗好耐 D 蛋都唔熟, 究竟搞乜鬼呀....... 不過最後都搞O左好耐個蛋撻終於都熟啦, 但係後尾又發覺個撻皮好厚, D 蛋好薄, 又整得唔靚, O..NO...你搞乜鬼呀!!!! 之後因為仲有D材料用唔哂, 所以做埋曲奇, 不過當然唔係唧花曲奇啦..因為之前咪話O左失敗O既, 咪整公仔曲奇囉．　好彩都叫做順利完成．

搞到頭都大埋o既蛋撻

乜都整好之後，　心血來潮想同阿寶影返張合照，　咪叫我二家姐幫我渣機影相囉．．點知我二家姐影十幾張張張都唔清, 叫我大家姐影，佢又唔得閒，阿寶唔知係咪覺得煩，無啦啦獸性大發，失驚無神發狂爪Ｏ左我一下．．．好痛呀!!! 出血呀．．．皮開肉爛呀．．．．．第一時間放低阿寶走去洗傷口呀!!!! 仲要俾我阿媽鬧，　真係無辜，　天理何在，　我係受害者Ｏ黎Ｏ架!!!! 真係慘!!!

事發前影o既相.(唔清)

事發後. 我真的受傷了.
完傷口之後都食晚飯啦，　今晚係由我家姐煮．　食完飯我阿爸拎Ｏ左個由佢自己整Ｏ既籠出O黎，　因為之前話想買個籠Ｏ黎FOR 阿寶沖涼用, 因為以前佢細隻都仲可以幫佢沖涼, 但越O黎越大隻, 要幫佢沖涼好高難度, 因為佢好癲, 所以都諗住買籠, 但我老豆話等佢自己整, 所以今晚O黎出O黎試下放阿寶入去睇下阿寶有乜反應, 阿寶好迷茫唔知發生乜事, 不過都係困O左佢唔夠五分鐘就放佢出O黎, 因為今晚都未諗住同佢沖涼, 所以唔使用個籠住. 睇O黎個籠都唔錯, 哈...下次幫佢沖涼都方便得多啦. 一定唔會再受傷啦..我講我唔會受傷, 唔係阿寶呀!!! 我老豆真係好好諗頭O架, 佢成日乜都自己整. 哈.

呢個就係阿爸做o既籠. 仲有主角阿寶.

好驚呀!!!

2007-11-24T10:25:00.000+08:00

我尋晩發o左個好得人驚o既夢... 我發夢o係我舊居度, 見到阿寶o係度玩, 玩都癲o左周圍跳, 點知跳跳下跳o左去露台度, 點知唔小心跳o左落街呀...我發夢見到我自己經抻手去救佢, 但係都太遲....見住佢跌o左落街...仲聽到跌落街果o下[pa]一聲..嘩...好驚呀. 之後仲見到我阿爸返到屋企, 我就同佢講阿寶死o左呀! 跟住我阿姨又打電話o黎, 當然係發夢啦..我又同我阿姨講, 跟住有個friend打o黎, 我就忍唔住一路講一路喊....阿寶死o左呀.... 跟住我就醒o左啦...果一刻我即刻意會到我係發夢o者..不過真係好直實, 好驚呀.
唔知係咪以前聽講過有 d猫猫跌落街跌死．．．所以發埋d咁o既夢...真係好發唔發...依家個心都唔係好安樂.
我一醒o左就走去睇下阿寶, 佢一見到我就即刻走埋o黎, 睇見佢好地地當然開心啦!!! 因為真係發夢之麻...呢 d 咁o既夢唔發好過發呀. 真係嚇死...

杏仁曲奇

2007-11-23T21:04:00.001+08:00

噔..噔..噔..噔...杏仁曲奇送到.

將所有材料(除o左雞蛋)拌勻再搓好.

之後先將雞蛋加入再搓.

差到咁上下就變成咁樣.

放入雪柜雲五分鐘.

用曲奇模cut出各款形狀.

用180度焗12分鐘.

聽日會約我d 朋友, 所以今日就整定 d曲奇，　聽日送俾佢地啦．　我都係跟〔Katy & Betty Kitchen〕　呢個網整ｏ架，　大家有興趣可以入去睇睇．
個網所教ｏ既係　榛子曲奇，　不過我無榛子，　只係有杏仁, 所以就轉用杏仁粉o黎做. 整完之後下試試先, 食落去都會食到少少好細粒杏仁粒粒. 由於我d曲奇模唔係好大個, 所以唔止個綱度話整o左三十磈, 我整o左over 三十磈o架, 不過確實有幾多磈我就無數到啦.

當床訓!!!

2007-11-23T11:33:00.001+08:00

阿寶: 呢度好舒服呀.....

阿寶: 唔好影我啦~~

GRACE: 凍呀, 俾張被你呀.
阿寶: 唔該哂!!

阿寶呢排越o黎越多花神, 依家唔肯去個猫兜度飲水, 一定要我地拎個兜放o係洗手盤度先肯飲. 真係俾佢激死. 依家都跳上個洗手志盤度當床訓....唉....濕麻... 之前佢要跳上個洗手盤度, 都要先跳上個坐廁然後先去到個洗水盤, 但係依家唔使啦..o係地下一跳就跳到去佢呢張[床]度. 試問我又點能夠廿四小時睇住你呢..你再係咁你就一身都係濕疹o架啦...

又去佛堂食齋

2007-11-22T20:49:00.001+08:00

今日阿媽阿爸都去o左佛堂幫手, 其實呢幾日佛堂都有大o既法事做, 所以都好熱鬧, 而呢幾日都有齋食, 所以今日約o左家姐同佢 d朋友去ｏ左佛堂食齋，　一去到佛堂都已經見到好多人ｏ係度幫手，我阿爸阿媽當然係其中ｏ既兩個啦!! 不過一入到去，　就叫我去食齋，　由於我家姐同佢　ｄ　朋友比我早戈到佛堂，　所以入到去已經見佢地ｏ係度食緊齋啦！！　今日o既齋菜依然係有好多款式, 不過我唔記得影呀, 我諗如果我係有影到, 你到見到都會話多呀. 其實家姐O既朋友都係第一次O黎佛堂同食齋, 佢地都話 D 齋好食呀. 我都食O左好多呀. 之後食飽O左我地都走啦. 而我就同我家姐再出O左去元朗行. 元朗都有好多平O野O架, 我地入O左去一間鋪頭, 裡面都係買Ｄ　家居用品，俾我見到上次Ｏ係花園街見到果個蛋糕模，不過我都唔係好記得Ｏ係花園街見到幾多錢，但係上次無買已經有 D 後門, 所以今日再見到就急不及待即刻買O左佢呀!! 點知行到埋收銀, 個阿姐話有八折呀, 哈...真係開心, 原價$37, 依家就29.6咋, 無啦啦平O左!!! 之後就繼續行, 家姐就話去買勝利牛丸, 佢話好好食, 由於我唔食牛, 所以同佢去買咋, 跟住又去O左一間上海鋪九菜餅, 蔥油餅, 不過係買返屋企食O架!!! 我拎到返屋企都仲熱O架, 好好味呀!!! 下次再出元朗都要買O黎食. 買完O野對腳都攰攰地, 我同家姐就坐車返屋企啦....

我就係買O左呢個蛋糕模啦!!!

薏米腐竹蛋糖水

2007-11-21T17:56:00.000+08:00

早幾日我阿爸話想食薏米, 於是今日就走o左去買材料整o左呢個薏米腐竹蛋糖水, 事關又易整, 又好味, 依家天氣咁乾燥, 最好就係食返 d糖水潤下啦!!!
預備定ｄ材料，包括洋薏米，白果，腐竹，雞蛋，冰糠，清水.
(唔好意思, 唔記得寫返 D 材料O既重量. 所以俾唔到詳細O既重量呀)

1)先將d洋薏米洗乾淨之後用水浸一陣.
2) 白果去除硬殼將白果放入滾水中浸一會去除表面的E, 再去除白果裡面的一條芯.(因為果條芯有苦味)
3) 將清水煲滾, 將洋薏米, 白果及整碎O左O既腐竹加入滾水中煲.
4) 用另一個煲將雞蛋烚熟.
5)腐竹煲到好似豆漿狀而洋薏米亦都軟身就可以加入冰糖, 待冰糖溶哂之後再加入已烚好O既雞蛋, 亦都可以加入一隻雞蛋做蛋花.
完成, 食得.

肥姐你要加油呀!

2007-11-18T21:01:00.000+08:00

今日約o左好友食晏, 其實都係簡簡單單走o左去食米線, 之後好友要要俾 d 野佢個細佬同弟嫂, 所以就約o左o係麥記等, 我地坐低無耐就見到佢地, 我都有一排無見過好友呢個侄仔, 今日見到佢一樣咁我好傾, 因為呢個細佬真係好多o野講o架!!! 哈... 佢得五歲咋, 不過好鬼健談o架!!! 佢就係因為把口叻, 所以都攞過幾次講故事o既奬, 哈... 大家可想而知佢幾咁口齒伶俐呀!!!! 之後好友將d o野俾o左佢細佬同弟婦之後, 我地都走人啦!!! 再係咁e逛多一陣就走人啦!!!

尋日大家有冇睇無線呀?? 我睇見肥姐, 雖然見到佢仍然可以好勇敢咁同大家見面, 但係相信佢身體係好弱, 要對抗病魔唔係一件容易o既事, 希望佢可以堅強咁面對, 亦希望佢可以戰勝病魔!!! 加油呀姐姐!!好多人持你o架!!!

屯門咖哩

2007-11-17T23:51:00.001+08:00

今日約o左好友食飯, 但係屯門區都食得七七, 八八, 都唔知食乜好,後尾諗諗下記得上次我家姐去過置樂果邊o既一間[屯門咖哩]食過話幾好味, 所以就去試試啦. 可能我地比較早去到, 入到去間鋪頭都未有客, 哈...所以你話我地幾早呀. 一坐低就有位印度o既太太用廣東話同我地落單, 佢講得好好o架!!! 我地叫o左一個二人餐, 估唔到個餐都幾多o野食, 兩個人食就多o左少少, 不過味道都OK, 價錢亦唔貴, 算係咁啦!!! 我覺得最好食都係果碟炸物, 其實我唔知係乜O野O黎, 但係就好味!!! 有機會都叫 D FRIEND O黎試試.

去到同走都唔記得影間鋪既門口樣, 只係影O左間鋪頭入面O既環境.

我地叫果個餐.

呢碟炸物, 我真係唔知入面係 D 乜, 不過幾好味O架.

餐湯, 都係唔知乜O黎, 不過就有D菜碎O係入面囉. 味道OK.

串燒雞件. (我初初仲以為會係一串串咁上碟.

咖哩雞. 其實另外仲有一碟咖哩羊, 不過兩碟都差不多, 所以廢時影.

薄餅OK啦. 有四件O架, 用O黎點咖哩, 好味.

炒清菜, 無咪等持別, 不過d菜都好爽口.

好平呀!!

2007-11-15T20:53:00.001+08:00

今日我家姐打電話俾我話佢會出花園街行下, 我都好耐無出街, 所以就約埋一齊出去逛下啦!!! 花園街 d o野真係好平, 行o左無耐就見到有一檔係賣d家居用品, 俾我見到呢套唧咀呀, 一套十二個, 你地估下幾多錢, 真係平到你唔信..............

係十五蚊呀!!!! 實在太平啦..........................

另外又入o左去一間鋪頭度買o左呢套杯, 你又估下幾多錢??!!
九蚊咋. 哈....雖然我都知一定唔係原裝貨, 但係以咁o既價錢....你想點呀!!! 不過真係幾靚o架!! 可以話係又平又靚!!! 之後我地就再行o左去金魚街, 亦即係通菜街度睇金魚, 不過我就無買金魚, 買o左接吻魚同埋兩款唔同色o既麗麗, 本來想買神仙魚, 不過最後都係無買到.

你睇下幾多魚, 一包包, 鍾意邊包就揀邊包啦.

之後行到差不多五點都走人啦...因為都攰攰地啦...而我家姐都要返屋企啦!!!下次再去花園街可又係幾個月之後啦~~

阿寶好似...[屎]o左咁!! 哈..

2007-11-14T11:52:00.001+08:00

我都知你好睇訓, 但係你使唔使訓到條脷都走埋出O黎啦..唔知O既人仲以為你死哂呀...快 D 收返埋你條脷啦!!!

呢張就好D, 起碼識得用隻手遮住個口, 訓到條脷都抻埋出O黎都無人知啦.醒目呀!!

阿爸阿媽返喇!!

2007-11-11T20:18:00.001+08:00

阿爸阿媽足足返O左鄉下成個星期, 今日終於都返屋企, 呢幾日佢都好辛苦啦!!! 所以我緊係要煲個靚湯, 煮返幾味俾佢地食啦!!!! 雖然個賣相唔係咁靚, 但係味道都幾好O架!!! 哈... 我阿爸阿媽都話好味!! 我自己都食O左好多!!!

霸皇花煲豬[爭]湯

呢條係班, 不過我唔知佢係乜o野班.

麻婆豆腐

咖哩薯仔雞亦

沙炒波菜

阿寶你可唔可以乖d呀.

2007-11-11T16:27:00.000+08:00

乖o既時候好地地...失驚無神就會咬死你!!

呢幾日阿寶好似發o左癲咁!!!! 成日跑o黎跑去, 你跑我都唔會怪你, 但係你都唔好成日無啦啦走o黎咬我呀!!! 有時諗住摸下佢, 點知一模佢就咬埋o黎, 仲有用佢果兩隻手攬住我隻手係咁咬! 痛死我啦!!!! 雖然不至咬到出血, 但係我隻手都俾佢咬到花哂!! 我實在忍唔住啦!!!! 唔打下佢都唔得!!! 不過打又有乜用呀!!! 轉頭佢又咬我啦!!! 我實在對佢無哂符, 仲有呢幾日都聽到阿寶無啦啦係度叫, 果種叫法好似係發情果 d 叫法, 佢都大個仔啦....... 唔知係咪因為咁o既原因, 佢 o 情緒好高漲, 脾氣又唔好, 要你o既時候就要你抱, 唔鍾意o既時候就掂下都咬人, 好難捉模呀!!!!

阿寶寶大佬, 你乖d 啦......我雙手已經好受怪o架啦.. 你放我一馬啦..唔好再失驚無神走埋o黎咬我啦!!!! 唔係我真係好唔好老皮o架...到時又打你你唔好怪我呀!!!

蜜糖鬆餅

2007-11-09T16:47:00.000+08:00

蜜糖鬆餅

部份材料

所有材料加埋拌勻

分成幾份

焗好啦.

一直都好想整英式o既鬆餅, 但係一直都無去做, 今日終於都動手去做, 不過做出o黎無想像中咁好, 不過食落去都幾好味o既!! 不過同 KFC比, KFC果 D 好食D. 哈...因為我覺得我做呢個發得唔夠大, 如果再發大多少少, 就更加好.

材料同做法我係跟[豬妹]呢位BLOG友做O架有興趣可以去佢個BLOG度睇睇.

十一月生日之星

2007-11-08T14:31:00.000+08:00

話咁快又到十一月, 又有朋友生日啦. 今次我都係約我 d 朋友去[五月花]食, 因為佢地未試過, 不過今次係食放題, 唔係散叫, 但係放題o既質數差好多, d o野無咁好食. 所以我都係覺得唔好揀放題.

一早低真送上免費ｏ既火鍋，　由於係唔使錢，　所以都係唔好食ｏ架．

於題就當然係不停咁叫ｏ野食啦，　你地睇一枱都係呀．　　不過唔係全部都味囉．　
之後食食下其中一個friend拎o左 d o野出o黎, 原來佢最近去荷蘭公幹, 買o左手送俾我地, 好靚o架, 一人一份..

前面紅色果個風車就係我o既, 係咪好靚呢...

其他好朋友揀o既, 有筆.

有牙籤筒, 全部都好有荷蘭o既風味o架!!!

阿巢...多謝你呀!!!

另外, 都要祝yvonne生日快樂, 身體健康, 生活愉快!!!!

沙律包

2007-11-06T17:45:00.001+08:00

今日做o既沙律包.

我都好耐無整過包包, 今日終於[的]起個]起個心肝郁手整包. 手頭上o既材料唔係好多, 得 d 腸仔, 吞拿魚, 粟米, 但係又唔想整齋吞拿手包, 齋腸仔包, 所以諗諗下不如將 dｏ野加埋一齊再加　ｄ　沙律整個沙律包好過啦!!! 整完出ｏ黎都好滿意．　好味道!!!

都係先搓好個麵糰. 然後蓋上保鮮紙發酵45分鐘.

沙律整好放入雪柜備用.

第一次發酵完分開八份做形.

第二次發酵完成.

用200度焗10-12分鐘. 完成.

材料：）８個）
沙律：　其實任自己鍾意啦，　我就只係用ｏ左腸仔，　吞拿魚，　粟米，　沙律漿．　將佢地搞埋一齊放入雪柜備用啦．
包：
高筋粉：　２５０克
糖：　３０克
酵母粉　：　５克
奶粉　：　８克
牛油：　２０克
奶　：　１１０克
蛋　：　半隻（用ｏ左哂果半隻蛋留返ｏ黎掃包包表面)
湯種　：　（高筋粉１５克，　滾水　７０克　－將兩者加埋一齊搞勻

做法：
１）　將牛奶，酵母和五克糖放在一起拌勻待五分後用．
２）　高筋粉篩好加入餘下ｏ既糖，　奶粉，　湯種，　酵母奶，　蛋，拌勻，　然後搓，　搓至唔黏手及有彈性. 然後將牛油加入再搓一會, 跟住將麵糰放入已掃油o既盆內,再蓋上保鮮紙發酵45分鐘.)
3) 取出麵糰壓平切開八份(每份約60克), 　放在紙模上，掃上蛋漿，　將沙律加入．　蓋上保鮮紙第二次發酵，　大概發酵三十分鐘．
４）　焗爐先以２００度預熱．
５）　將包包放入爐焗１０－１２分鐘．　（包包表面金黃就oｋ) 完成．

十一月的阿寶

2007-11-06T12:08:00.001+08:00

天氣開始轉涼, 聽講話貓貓會鬆起d 毛令自己暖d, 所以呢排見阿寶都好似大隻o左, 圓o左, 應該唔係肥o左, 只係鬆起o左d毛.

以下d相似唔似証件相呀. 哈..

呢張好cool.

呢張好似嚇親咁.

呢張好寸.

呢張扮哂好多o野諗咁.

另外, 阿寶呢排更上一層樓, 越跳越高, 依家成日跳上去個電視機度, 但係如果個電視開o左佢就唔會跳上去, 關o左先會坐上去.真係想死呀!!!

如果阿爸阿媽o係度, 佢休想o係個電視上行呀.

佢以為自己好醒.

欣欣，　喬喬

2007-11-04T16:55:00.001+08:00

今日約Ｏ左　ＳＵＫＩ同　ＳＡＬＬＹ飲茶，　去到酒樓見到欣欣變Ｏ左熊貓，　一邊眼黑Ｏ左，　其實之前都聽聞欣欣Ｏ係幼兒園撞到，　但係無諗係撞得咁勁，　眼到佢咁真係好肉痛．　不過小朋友都係好天真，　見到佢一Ｏ黎到望都我就即刻笑哂，　真係想錫佢幾淡，　不過見到佢咁又好心痛，　相信ＳＵＫＩ仲心痛．　希望欣欣快D 好返啦!!

係咪見到都心痛呀. 欣欣撞到O既時候一定好痛呀.

欣欣話最緊要有得食, 食飽就乜都唔記得!!!

欣欣第時一定要小心D呀. 知唔知!!!!

另一邊廂O既喬喬, 幾咁得戚, 哈...

喬喬得兩歲幾咋, 不過佢畫 D公仔都幾靚Ｏ架，　似模似樣架．

畫完畫又搞搞震．

你睇佢地兩個玩得幾開心．緊係啦，　大家都係兩歲幾，　無代溝呀麻．

喬喬就比較主動，　走Ｏ黎走去同欣欣玩，　你睇欣欣幾開心．

食飽飽Ｏ係酒樓門口影下合照先．喬喬大欣欣兩個月，　不過都高欣欣好多喎．　

佢地兩個真係好得意．　哈．．．

表妹囡囡擺滿月酒

2007-11-04T15:35:00.001+08:00

尋晚係我表妺囡囡o既滿月大喜日子, 佢o係沙田o既皇都酒樓擺o左五圍, 人咁多, 自然好熱鬧, 我約o左家姐o係屯門一齊坐車出去沙田, 雖然之前表妹註冊商標o既時候都係去呢間酒樓, 但係當時係阿姨佢地帶我去, 所以都無留意間酒樓o係邊頭, 尋日再去呢間酒店時, 都唔識路, 所以一路行一落問人啦, 好快就去到啦. 到o左現場已經見到表妹, 阿姨同姨丈仲有佢奶奶同埋男家o既一d 親友, 去到當然要同主角影o左相啦. BB訓緊覺呀.

栢桐呢個角度似媽咪.

訓O左又似爸爸.

醒喇!!

栢桐: 乜咁多人O既??!!

栢桐: 我都唔識佢地O既!!

不過之後呢個又抱下, 果個又抱下, 好快就醒O左喇~ 栢桐個樣一時就似媽媽一一時又似爸爸, 好難捉模呀!!! 應該再大 D 會明顯D. 不過我就覺得似表妹多D.

尋晚除 D栢桐一個ＢＢ外，　仲有表哥個囝囝梓齊，　佢都一樣咁可愛Ｏ架．　上次佢擺滿月Ｏ既時候，　影親佢都係訓緊覺，　今次見佢終於都見到佢訓醒喇!!! 無見唔夠一個月個樣又唔同Ｏ左小小，　不過都係咁得意．　等我又同佢影下相先．

梓齊兩個月大喇!!! 係咪好得意呢~阿姨抱住梓齊個樣幾咁開心．

梓齊望住個鏡頭. 哈..

除O左梓齊仲有琪琪同婷婷呀. 佢地亦都大過O左小小, 依家開始學講O野. 佢地都係歲幾咋. 好好玩O架.

琪琪: YEAH.........

HI...........

婷婷望鏡頭呀.

呢邊呀. 望呢邊呀.
同小朋友影相真係唔係咁容易O架.

同佢地影影下相, 個相機原來唔記得叉電, 無得影喇, 真係大意. 唉...之後就要麻煩家姐繼續同佢地影相啦~
尋晚因為 D餸菜上得慢，　八點幾開始食，　食都十點幾先食完呀!!! 我都好攰啦．．返到屋企都差不多十二點　要早　Ｄ　訓先得，　因為聽日約Ｏ左　ＳＡＬＬＹ，　ＳＵＫＩ　佢地飲茶呀．　
食到咁飽當然都好快就訓著啦．　ＺＺＺ．．．．．．．ＺＺＺ．．．

十一月的阿寶

2007-11-02T14:17:00.000+08:00

以下係片段不適合兒童觀看!!!

寶: 邊個影我相呀, 你邊間報館o架??!!!!
GRACE: 扮乜呀, 我同你影相呀.

影我相要出聲呀麻, 等我擺好 d個 post先得呀麻!!
GRACE: 快D 啦!!!

鼠友: 寶哥哥成日都以為自己好型o架, 你影得佢唔靚佢會唔高興o架.
GRACE: 鼠友兄你入哂鏡啦, 唔好失驚無神走出o黎至得o架!!

寶: 你係咪玩o野呀.
鼠友: 唔小心行過o乍, 使唔使咁認真呀!!

寶: 你呢條友唔教訓下你都唔得o架!!!
鼠友: 無心o架, 救命呀.........
GRACE:我乜都睇唔到. 繼續影相.

寶: 咬死你, 咬死你!!
鼠友: 我死啦~~~~~~~~~~

涼涼地

2007-11-02T13:20:00.000+08:00

早幾日約o左 d friend 去打邊爐, 因為天氣轉涼o左, 最好當然就係打邊爐啦!! 我地去o左荃灣o既稻香酒樓,因為一早就booko左位, 所以一去到就有位啦, 其實去稻香扛邊爐最好就係夜晚九點後, 因為係特價呀麻, 平好多o架, 不過等到九點先有得食就真係餓死, 所以無法啦, 我地早少少七點幾去到, 貴d就貴d啦. 另外, 亦因為之前去台灣o既時候, 我地一人夾o左 d 錢做公數用o黎出街食o野用o既, 旅程完畢之後仲有小小錢, 所以用埋去囉.

果晚 d o野食都幾好味, d 海鮮都幾新鮮, 真係比起幾十蚊任食果d好味好多啦, 我地由七點幾打到差不多十點先走人, 當然又飽又暖啦. 遲 d 再凍d 再去打過!!!!正呀!!

阿嫲走o左喇.

2007-10-30T06:44:00.000+08:00

今朝六點收到阿爸打o黎o既電話, 佢話阿嫲o係半夜離世啦. 其實因為都知阿嫲o既情況唔係咁好, 阿爸已經o係尋日返o左大陸睇阿嫲, 幸好佢可以睇到阿嫲o既最後一面, 其實阿媽都會今朝返去, 但阿嫲等唔到啦. 不過阿媽都會照原定今朝返去幫手打點一切, 其實我都好多年無見過我阿嫲, 因為住o係大陸好遠, 我阿爸阿媽都唔使我地返大陸, 而我身體麻麻, 所以就更加唔使我返. 所以阿嫲最近係點o既樣我都係從我阿爸影o既相當中睇到o架.
其實阿嫲因為病最近都無食o野啦, 所以佢o既離開亦都係一個解脫, 希望佢去到另一個更安寧o既世界啦.

媽媽六十大壽

2007-10-29T16:49:00.001+08:00

尋日幫我阿媽搞O左個六十大壽食返餐O既晚宴呀. 哈...請O左阿姨, 曾太一家O黎飯呀.

阿媽最鍾意打麻雀, 所以我地買O左個麻雀形O既蛋糕俾佢, 個蛋糕真係幾得意O架, 我阿媽見到不知幾開心, 笑到見牙唔見眼, 個蛋糕得意之餘仲幾好食O架!!! 個個都食得好開心.

尋晚都係擺O左兩圍O者, 雖然人數唔係太多, 不過最緊要係大家食得開心呀麻. 不過尋日果餐我自己覺得麻麻地, 希望大家唔好介意.

細路哥就最開心, 有得食, 又有得玩. 你睇珩珩同希琳大過O左幾多.

佢地仲做埋攝照師, 一人一部相機, 呢度影下, 果度影下.

阿瑜就一個人坐O係度打機.由於坐得好埋, 影唔到佢個樣. 哈..

呢 D 就係尋晚食O餸, 其實仲有炒飯同麵, 不過無影到呀.

O係呢度祝阿媽身體健康, 龍馬精神, 每一日都開心快樂!! 日日都順順利利, 平平安安!

其實十一月初先係正日, 到時再整個蛋糕俾佢食. 哈...

台灣之旅- 第四天

2007-10-29T13:47:00.001+08:00

話咁快就到第四日, 亦都係o係台灣o既最後一日, 一早都係去食早餐先啦, 唔係邊有力行. last 呢間酒店既早餐都係好豐富, 環境亦都好好, 由於今日係自遊活動, 所以又可以晏d起身, 又可以食早餐食耐d, 唔趕使趕.

食完早餐就坐捷運去淡水. 我都係第一次坐捷運咋, 所以都影返張相留念啦. 捷運o既車票同香港MTR唔同, 係一個圓形膠板, 都幾得意喎!!

O係月台等車O既時候, 我 D FRIEND 見到有個男人同我一樣著橫間衫, 吃我走過去影相, 哈...不過影完先發覺我其中一個FRIEND幾咁鬼馬, 用腳抻我,真係好朋友啦!!

上車啦, 車廂同MTR都唔係差不遠.

由於唔係一程車就到淡水, 中著仲要轉一次車, 所以落車之後再行去轉淡水線.

到O左淡水啦. 之前O係7仔買O左樽以為係西柚汁O既橙汁, 自己都覺得自己低能.

呢度就係淡水啦, 不過潮退呀!!

行行見到, 係咁E影返張.

呢度又影張.

我地行到十二點左右就搵地方開餐.

O係呢度坐低食下O野.

叫O左呢 D O野食. 白色坐坐地果舊O野 , 應該係清蒸肉丸, 我覺得好好食呀.

食飽O野都要搵返　Ｄ　甜品食下，　我地買Ｏ左雪條食呀．　呢　Ｄ　雪條好得意，圓圓地，都好厚身Ｏ架，　我要Ｏ左隻芒果味，　好好食Ｏ架！！

由於我地個個都係第一次Ｏ黎淡水，　白白痴痴咁Ｏ係海邊行Ｏ左好耐，　都唔知原來後街好多Ｏ野睇，　唉．．搞到無乜時間慢慢行，　亦都因為三點半前要返酒店集合，　所以趕頭趕命咁行Ｏ左一陣就搭車走啦．　真係可惜．

唔知兩款郵筒有乜分別呢?

返到酒店啦好彩無遲到．

又返到機場啦．

同我地呢個台灣導遊廖生影返張相先，　佢真係對台灣好了解Ｏ架！！

我地果晚搭返香港呢班國泰空中巴士Ｏ岩Ｏ岩落Ｏ左地國幾月咋，所以好新款Ｏ架!!! 又乾淨．

呢個就係我果晚Ｏ既飛機餐，　味道麻麻啦，　不過好肚餓，　全部俾我食哂．　哈．．

食飽Ｏ左就用Ｏ左呢個新Ｏ既功能，又有戲睇，　又有歌揀Ｏ黎聽，　有Ｄ歌仲好新Ｏ既!! 仲有得打機．不過我地呢一程機飛得個幾鐘，　食得飯Ｏ黎都無乜時間玩就到香港啦!

返到香港啦．　呢一刻我地Ｏ係度等行李呀!!! 大概等Ｏ左十幾分鐘就攞到行李啦!! 香港機場效率真係高!!! 　

整體Ｏ黎講呢個台灣四天遊係開心Ｏ既．試Ｏ左好多未試過既食物，　我又頂得順玩哂四ＤＡＹ，　我呢五個好朋友又好好玩，　台灣導遊又好好，　香港果個領隊就超廢，　似團友多Ｄ，　Ｄ團友又無乜麻煩友，　都好順利完成整個旅程．　不過都有Ｄ可惜Ｏ既Ｏ野，　我無去到書店睇書，　我無試台灣地道Ｏ既珍珠奶茶，　我果團無靚仔，　哈．．．有機會Ｏ既話都會再去台灣，　不過想先去日本先．　睇下幾時有機會啦!!

台灣之旅第三天

2007-10-26T17:07:00.000+08:00

第三日上早就去o左[故宮博物館] 裡面有好出名o既往不究白菜)同(豬肉)兩件珍貴o既玉器, 不過唔可以影相, 所以去到裡面乜都無影, 其實如果係自己入去睇就只會走馬看花, 不過我地台灣呢個導遊好好呀, 佢一路都有講解, 有好多睇落去平平無其o既珍品原來都有一個故事, 所以令到好悶o既博物館都變得精彩.

o黎到當然都同[佢]影o左相啦, 不過又係超哂..

其實呢度好熱o架, 落去好似煎蛋咁呀. 所以一影完即刻彈起身.

其實係一對獅子, 左一隻, 右一隻, 不過我只係影o左一隻咋. 導遊講如果你最近運情麻麻就唔好同獅子一齊影相, 而我就唔知自己好唔好運, 所以都係費時同佢一齊影啦~~

無所事事, 叫香港o既領隊幫我影張相, 唔係過幾年都唔記得自己跟邊間遊行社.之後我地就去食晏啦!! 由於係第三日, 食o既都會係比較好o既一餐, 因為第四日係自由行, 自己顧自己, 所以呢一餐都係遊行團包o既最後一餐, 當然會食好d啦. 我地就係去呢間[頂廚]食所謂o既國宴, 講得好似好勁咁, 食都幾好食o既, 不過國宴又點會o係呢 d 地方食到呀!!

不過都算係遊行團包o既餐當中最好食o既一餐.
之後去o左茶藝館]不過我無影相呀, 因為其實係叫你去買o野o既鋪頭, 幾佰蚊一包綠茶粉....你買唔買呀?!! 我就唔買囉! 呢以都係齋睇, 同埋睇下茶館講解果個伯伯o既精彩推銷囉!! 仲同我地玩d小遊戲, 其中一個女團友實在太落力, 結果出事......不過唔係乜o野大件事, 只係過份出力飲d茶搞到賴o左小小尿呀......真係難睇死..不過都無乜團友知, 得我地幾個知咋..因為個女團友同我個friend講呀..所以我地咪知囉.真係肉酸死呀!! 之後個女團友失蹤o左一陣先再出現, 我地估佢應該去換褲, 不過佢返到o黎就話買o野買耐o左. 哈...
之後我地再出發去浸溫泉.

就係去呢度浸啦, 你見到呢兩個人係我地o既團友, 哈...

我地三個就係o係呢度浸, 由於大家都好怕羞, 亦都好知羞, 所以都好小心咁浸, 大家都叫對方唔好睇對方, 哈.... 呢個池有按摩功能, 我地一開果個按摩o既按鈕, 我o既其中一個friend就發生意外, 哈......佢o係個池度[反肚]呀!!! 當然即刻走o左光啦, 哈...不過我睇唔到呀, 我好堅待唔望佢地呀麻!!! 由於實在太好笑, 我地三個搞o左好耐(其實自己唔覺耐), 我地係最遲出返呢o既三個, 真係唔好意思.
其實你話浸完係咪好舒服, mm....我又唔係好覺, 係一身流黃味囉. 個導游初初仲話浸完d皮膚靚三日, 哈...可能我浸唔夠, 我唔夠有乜唔同.

之後都係溫度館影下相, 環境都幾好o架. 之後導遊再帶o左我地去買[天祿]即係貔貅, 呢個都係跟團去台灣既指定動作, 不過我地自己呢班friend就無人買, 團友都好似有一個買o左, 我都係無影到相o架!!! 不過聽 d sales講o野又係好好聽, 又搞笑, 都算係一個幾好o既節目.

夜晚我地就去o左[西門町街]逛, 呢餐晚餐都係自己搞掂o架, 所以我地就去o左導游話好正, 好平o既[美觀園]食日本菜.

外面都有少少日本feel, 不過真係好少呀.

入到去以為去o左茶餐廳, 仲係舊式果隻, 完全唔覺得有去食日本o野o既感覺. 不過話知佢啦, 最緊要 d o野好食, 我地叫呀..叫呀..叫...真係叫o左好多o野食.

魚生都生鮮, 其他o野食都ok啦. 價錢方面除返每人佰幾蚊. 其實同香港o既價錢差不多. 不過初初個導遊講到平香港一半, 所以大家都以為會好平.不過都真係食得超飽. 食到咁飽當然要逛逛西門町啦.

呢度都行得幾舒服, 無市林夜士咁多人, d o野又新d, 不過都無乜時間行, 只係走馬看花. 之後返酒店啦. 今次呢間係五星級o既[皇冠大飯店]間房都好大o架, 感覺都好舒服.

次次都係搞到間房亂哂先記得影相. 真係失禮哂!!

呢一晚其實我地都有出去逛, 不過食完個甜品之後我唔係太舒服, 所以麻煩sally 同我坐的士返酒店先, 其他幾個friend繼續行. 佢地後尾話食o左好多好食o既o野呀. 不過其實我返到酒店都已經十一點幾...sally都話好眼訓要早木訓, 我 d friend就十二點幾先返到酒店.
好啦, 第三日o既行程係咁上下啦.

台北之旅第二天

2007-10-25T20:05:00.001+08:00

話咁快又係第二日o既行程, 一早起身就o係酒店食早餐, 呢間酒店d早餐麻麻地, 無乜好揀.

果日勁哂!!!!

食飽之後就係去中[中正紀念堂] 不過都無乜ｏ野好睇，　行ｏ左一陣就出返ｏ黎影相．不過好多O野都修葺緊, 所以都無乜心機影.係咁e影o左幾張相就去第二個景點[圓山飯店]

唔好意思, 影得唔好.

行完之後就去食晏, 我地就係去o左呢間[如意大樓]食飯囉.

就係食呢個火鍋, 其實仲有其他o野食, 過唔記得影呀. 之後食飽飽就上九份.

人好多呀...好似花園街咁多人呀.

有好多從未見過o既食品, 不過我都都唔係樣樣試.

呢舊見到都唔想試, 只係見到咁搞o野就影低佢啦.
呢個薯片好好味o架, 又脆又香口, 我地買o左兩條分甘同味.

呢個係好似茶果咁上下o既o野, 甜甜地咁.(你睇後面幾多人)

呢個又係唔知乜o野, 都係無試o架.

呢個都無試.

之後去o左呢間茶館飲o野.

一人叫o左一款, 各有特式, 我果杯就係綠色果杯, 係苦瓜汁, 因為實在太熱氣, 所以飲返 d 涼o野先得.

行到四點都要走人去集合, 個天都開始暗暗地.之後再去o左坐摩天輪.

去o既時候都未著燈.

不過無幾耐就燈火通明.

排緊隊入場.

我地坐緊摩天輪, 好驚呀, 而且好黑呀, 我同兩個friend驚到死死下, 坐對面o既好友一d都唔驚, 仲係咁郁, 搞到個車廂係咁郁, 我就驚上加驚, 因為感覺好無安全感, 好似就快跌落街咁(當然唔會發生d咁o既事)但真係好驚!!!!! 足足坐o左廿幾分鐘, 驚足廿幾分鐘.玩完落返地下簡直係從生...(好似誇o左少少)

之後o係呢度集合又再去第二個景點[士林夜市]

一去到當然要食最出名o既[大雞扒]啦!!! 本來都同件雞扒影o左相, 不過個friend影得我黑蚊蚊..所以唔post出o黎.

另外當然要飲白苦瓜汁啦~~ 味道ok啦, 苦苦地咁囉.

之後就試下其他o野食.

買o左百幾蚊生果, 係呀, 係百幾蚊, 呢度係其中一樣, 台灣d生果真係好貴!!

食下果度食下, 你話係咪好好食呢..mm...一dd啦!! 之後食飯又返酒店啦. 不過我地又o係酒店附近買o左o野食囉. 哈...

就係呢d啦. 好好味o架!!! 其實我都唔知叫乜, 係我兩個friend去買o架 , 裡面有 d 豬腸, 菜, 粉絲等等, 味道好好, 好食過市林夜士果 d o野食.

食飽飽就訓, 第二晚訓得好好, 一覺訓到morning call先醒呀!!

台灣之旅第一日

2007-10-24T21:45:00.001+08:00

10月19號一早七點幾就到機場喇!! 我地就係搭呢班機去台灣喇!!

果朝o係飛場上面食o既早餐, 真係一件大大件既腿蛋包, 生果同橙汁.

去到台灣機場, 第一時間去換錢.

第一個行班係去六福村主題公園, 不過未去之前要醫肚先.

呢餐就係o係六福材主題公園附離o既菜館食飯. 味道普普通通啦...真係好普通果隻囉.

出發去玩喇!!

另個當然唔會好玩啦, 只係用o黎影相o者.

好似去o左以前o既荔園咁. 哈.

呢度仲有個動物園o架, d動物好精神o架!!!!

玩到好似四點幾就要走人啦..之後就去o左101.

去到101導遊俾得一個鐘頭我地行, 你話可以行得d乜呢!! 所以行就無行, 我地又走o左去食o野, 我地叫o左以上o既食物, 全部都好好味o架!!! 尤其是個甜品呀, d豆腐花好香豆味o架, 香港都好小食到咁濃豆味o既豆腐花. 一個字[正]呀!!之後夠鐘又再集合去o左遊行團包o既[鼎泰豐]食晚飯. 呢間o野名氣就大, 仲有好多日本人去食, 不過係咪真係咁正呢...我自己就覺得普普通通啦!!! 無乜特別囉.

食飽飽之後就返酒店啦!! 今晚住o既係[華夏飯店]四星咋, 所以都無乜特別.不過我地一返到酒店放低d o野又再出發去食o野, 因為導遊話附近都有 d 食店, 所以就出去望望啦.

我地搵到呢間叫聖媽香鍋, 入去試試啦!!

其實都係食 d 打邊爐o野, 都係叫一個鍋之後再點其他餸. 味道普通過普通.

食完係咁e都影返張街景.

呢度就係我住o既酒店房...係咪好舒服咁呢... 其實呢一晚我都無乜點訓過, 事關每一次去旅行我第一晚都係訓唔到!!!!

好啦, 第一日係咁上下啦!!!!

返o黎喇!!

2007-10-23T13:42:00.000+08:00

尋晚九點幾終於返到o黎香港喇!!!今次呢個台北四天遊, 我地都玩得好開心, 不過 d 團友都好斯文o架, 又靜, 我諗最嘈都係我地呢六個啦~~ 如果嘈到佢地就真係唔好意思啦~~~
由於影o既相實在太多, 不過影得唔靚(因為d人唔靚!!!) 景就好ｄ．　不過我取景又取得唔好，　所以相係影得多, 但係滿意就唔多!! 算吧啦．．!!! 玩得開心就得ｏ架啦!!! 　ｏ係呢四日都去ｏ左好多地方，　食ｏ左好多ｏ野，　有　ｄ　好好食，　有ｄ臭臭地，　有　ｄ　超熱氣，　家下個口都仲腫腫地．　　另外，　買ｏ野方面，　我係六個當中買得最少果個，　因為成日怕重唔想拎，　直到返到屋企睇返又真係好似少得制．．．．不過都無法都返o左香港, 下次再去先再買啦!!! 不過都唔知幾時先會再去. 哈....
今次最令我高興o既係成曰話攰, 又唔無力o既我, 居然頂得順之餘, 仲好體力過其中幾個friend, 可能佢地頭痛啦(其實我都有一晚頭痛, 不過都係一陣o者), 見佢地一個, 二個o係最尾返香港果日已經謝哂!!! 而我依然龍精虎猛, 可能因為我呢四日旅程日日都飲花旗蔘水, 所以有氣有力呀!!!! 其實都知關唔關事, 不過總之就唔攰啦!!! 又或者可能我去旅行之前做返多d運動有幫助啦!!! 係喎, 得閒都要去跑下步, 遊下水先至得.
經過今次呢個旅程, 令到我更加有信心再去其他地方游行, 哈....真係開心!!! 唔知下次又會去邊呢???? 日本都好喎!!! 不過諗下好啦..因為又要洗錢..好肉痛o架!!!
得閒會將呢四日做過乜, 食過乜簡簡單單咁post上blog. 到時再俾大家睇睇我地六個o係台灣搞乜東東啦!!

聽日飛喇!!

2007-10-18T17:57:00.000+08:00

話咁快聽日19號就飛去台灣玩喇!! 不過聽日都要好早起身呀!!! 因為要七點半就要o係機場集合, 不過話就話七點半要到, 我諗好多團友都唔會咁早去到機場, 所以我地依家都諗住八點前去到機場就算啦. 反正去到都係等團友, 所以費時咁早到. 不過我住呢度無直車去到機場, 要轉一次車, 唉...真係麻煩!! 初初都諗住有一部車係o岩搭, 點知原來係特別車, 只係得朝早五點幾同七點幾兩班車, 都唔o岩我o既時間, 所以要轉車囉!!變o左又要預多少少時間, 想訓晏少少都唔得. 唯有到時o係車度同飛機度訓多d啦!!!
希望呢個旅程一切順利, 最緊要係有力玩呀!!! 加油呀, 加油!!! 如果頂得住o既話第時可以再去其他地方玩!!!頂唔住就休想呀!!! 總之就加油啦!!!!!!

第三支防疫針

2007-10-17T11:43:00.001+08:00

呢張係o岩o岩睇完醫生打完針o既時候影o既, 佢都仲未驚完, 哈..

尋日帶阿寶去打第三支防疫針, 雖然已經係第三次去診所, 但係阿寶仍然係好驚, 但總算係無頭果兩次咁驚!!! 我地去到診所就已經見到有隻好大隻o既諾威那坐o左係地下, 所以都唔敢放阿寶出o黎, 驚阿寶見到隻大狗嚇到唔知走去邊就死火, 由於未到阿寶, 所以只好坐o係度等, 聽果個諾威那o既狗主講佢隻狗坐o係屋企個鐵絲網邊抻個頭出去望街, 點知就俾街外行過o既衰人用o野打佢個頭, 打到佢隻眼腫哂!!! 真係無人性, 我都見隻狗謝哂, 一路都痴住個主人, 頭du du, 真係可憐!! 之後見佢隻狗睇完醫生就到我地啦! 阿寶入到去見到醫生都唔敢郁, 醫生check阿寶o既心肺正唔正常, 醫生就話阿寶好緊張呀!! 個心跳得好快!! 其他都正常, 哈...阿寶o係屋企就惡死, 出到o黎就無鬼用!! 之後就同佢磅重, 今次係2.05kg, 即係4磅半左右, 比起九月去睇醫生時重o左一磅左夻啦, 醫生話差唔多o架啦!!! 唔使個幾字就睇完醫生走人. 下次再o黎睇醫生都係阿寶做(得哥)o既時候!!! 哈.... 希望一切順利啦!!

珩珩生日

2007-10-13T21:39:00.001+08:00

尋日係我細姨甥女生日, 我就買o左套米奇o既床鋪俾佢, 其實之前佢家姐生日我都買o左套維尼俾佢, 當時話如果到佢生日會買一套俾佢, 所以今次到佢生日當然要有口齒啦! 尋日送到佢手中, 佢都好鍾意, 最緊要佢鍾意, 哈.. 唔鍾意就死火.
到o左夜晚出去食飯, 但係今次點 d 餸麻麻地好食, 下次都係轉食其他o野! 可能會帶阿爸阿媽去食泰國o野, 我阿爸阿媽好傳統, 出親街食飯都係去酒樓, 叫佢地食其他o野都係 say no. 所以尋晚食完果餐麻麻地之後話下次再食就食泰國o野, 佢地都話ok, 咁到時睇下佢地反應如何啦!!

阿寶又大過o左少少喇!

2007-10-11T18:16:00.000+08:00

話咁快阿寶o黎o左我屋企差不多三個月, 由細細隻睇住佢到依家咁大, 不過當然仍未去到最大隻啦!!! 不過應該都唔會等好耐. 話時話貓貓幾多歲個體形型至大定o既呢 ?? 另外, 過多過多三個月就要帶阿寶去做絶育手術, 聽人講貓貓做完呢個手術之後會變得好肥, 唔知大家有冇聽過呢?? 到時阿寶一定好痛呀....

無再打o黎喇!

2007-10-11T07:54:00.000+08:00

尋日咪不停收到 d 不明來歷o既電話, 不過依家已經解決o左, 因為我尋日打電話去果 d打ｏ黎而又有ｎｏ．　顯示ｏ既人度，　同佢地講佢地想搵果個人飛線飛錯ｏ１左去我果度，　請佢地搵到佢地果個朋友之後就叫佢取消果個飛線，　最好笑ｏ既係，　打ｏ黎果　ｄ　人原來好似係ｄ外籍人，　而且仲好似係菲傭，　因為見佢地講廣東話唔係好正，　有一個就只係會講英文，　我就只好用我果　ｄ　係咁正確ｏ既英文同佢講啦，　好彩佢都明，　之後就無再打電話ｏ黎啦．　應該已經搵到佢地果個朋友叫佢取消個錯ｏ既飛線ｎｏ．　我都唔使再收到呢　ｄ朋友o既電話喇!!! 一天都光哂!!

飛錯線

2007-10-10T10:37:00.000+08:00

呢兩日唔知邊個個手機飛線既時候入錯我個手機no. 頭頭尾毛都over 10個三唔識七o既人打電話o黎, 但係又唔講搵邊位, 問佢地打乜o野no. 又唔講, 仲有一個女人好笑到問返我係邊個, 我話你打幾數電話又唔敢講, 淨係問我係邊個, 佢係咪咪痴o架!!! 尋晚十一點打過兩次o黎, 半夜又有一個男人打電話o黎, 問佢搵邊個佢就話打錯!!! 係咪想死呀!!! 今朝就接到七, 八個白撞同無電話顯示o既電話, 依家我都費時聲, 即 cut 線. 好煩呀!! 打過電話去新世界問, 服務員話無辦法, 因為係對方飛線過o黎, 佢地無o野可以做到, 只係叫我問返對方打幾號電話, 同對方講佢朋友飛錯線, 我夠知啦!!!! 果 d 打o黎o野女人好似我搶o左佢男朋友咁, 反問我係邊個, 真係痴線o架!!!! 就係我打緊呢個文章o既時候, 又有電話打o黎, 當然又係未見過o既電話no. 啦. 我都費時聽即收線!!!
咪再打o黎呀, 打錯呀!!!!!!!!

十月生日之星

2007-10-10T08:46:00.001+08:00

十月份同時間有幾位好朋友生日, 所以約o左尋晚去荃灣o既[五月花]食飯, 我就未幫襯過, 不過有朋友話ok, 幾好味o架, 所以尋日就決定去果度試一試. 由於遲d 會去台灣, 所以尋晚我地順便找返去旅行條數, 傾o左dd 關於旅行o既o野!! 淨係傾呢 dd o野都笑到肚痛, 我地都怕到時會嘈死 d團友，　俾人眼超超呀!! 之後點菜又搞ｏ左一大輪，事關講緊食乜ｏ野之餘又離題傾ｏ左第二　ｄo野, 正所謂三個女人一個墟, 何況尋晚唔止三個女人呢!! 成多一倍啦, 所以一人講幾句都有排講啦!!! 吹完一輪水之後終於都點好餸喇!! 食物水準都ok. 最緊要價錢合唔貴我地六個人都係食o左六百幾蚊, 即係一人唔使百一蚊. 其實呢間鋪係有自助餐食, 好似百四蚊左右一位, 不過我地諗住散叫都ok, 所以唔食自助餐喇!! 計起上o黎又平d, 同樣係食得好飽. 女人就係咁精明o架啦!!
飽時飽, 之後再出發去食甜品, 不過都只係去o左許留山食, 人地話香港係凍感之都, 真係無講錯, 果間許留山d 冷氣開到鬼咁大, 一路食一路俾頭頂d冷氣風吹到人到硬埋, 短短坐o左無半個鐘頭, 但係已經凍到震哂!!! 食飽走都走唔切呀!! 之後個個又飽又開心咁返屋企喇~~~~

650米

2007-10-09T11:09:00.000+08:00

今日比尋日更早起身, 六點半就已經醒o左喇!! 刷好牙玩好面執好裝備食埋早餐就出問口喇!! 7點45就落水游, 今日泳池o既泳客比尋日多, 因為大池有水運會進行, 所以泳客都轉去中池游, 所以游o既時候都要左閃右避,
另外咁早去游水見到o既泳客大多數都係一d上o左年紀o既伯伯, 師奶, 嬏嬏, 我呢 d 年紀都有, 不過就男人多d, 女人都唔多見.
今日游o左45分鐘, 總共游o左13個直池, 要再打破呢個紀錄唔係話唔可以, 不過會好辛苦, 所以下次再o黎游都唔會特登去破, 無謂呀麻!! 有得分埋.
游完返到屋企都差不多十點. 如果天水圍個泳池大d, 唔係d BB池就好啦!! 咁我咪唔使山長水遠去到屯門咁遠游水囉!! 淨係搭車來回都個幾鐘. 唉...

加油，　加油!!

2007-10-08T13:20:00.000+08:00

之前講過話為ｏ左今次呢個台灣之旅會去做運動，　哈．．．聽ｏ黎好似好誇，　對於身體超強ｏ既朋友ｏ黎講，　去幾日旅行任何時候任何情況都可以去啦，　使唔使事先做咁多ｏ野呢?! 不過認識我ｏ既朋友都知我因乜事要咁做，　所以都無謂多講!!
尋日我約埋我家姐姨甥女去屯門泳池游水，　由於最近都要幫我阿媽做一ｄｏ野，　所以星期一至五ｏ既四點前都最好唔好出街，　唉．．就係因為咁，　我都有成個幾兩個月都無去游水啦．．．不過為ｏ左應待旅行，　所以尋日星期日都即刻去游水啦．　
一係唔游，　一游就游ｏ左兩個幾鐘，　哈．．．．當然唔係不停咁游啦，　我都無力游啦!! 只係間唔中游下，　間唔中就傾計咁囉．　我諗尋日都游ｏ左五百米啦!!　可能停ｏ左一排無游，　尋日都有少少攰!! 　但總算支持得住．　
今日一朝早七點幾就再走ｏ左去屯門游水，　今次得我自己一個人游，　我就費事過大池游，　只係ｏ係中池度游，　都係游ｏ左４０分鐘左右啦，　都游ｏ左５５０米，　大概１１個直池啦!! 其實都仲可以再游，　不過我又費時我阿媽打電話ｏ黎問呢問路．．所以拿拿淋清洗完就返屋企啦．　就ｏ係我坐緊車返緊屋企ｏ既時候(10:06AM) 我阿媽就打電話ｏ黎啦!!! 真係準時．　　唉．．咪趕緊返屋企囉．．．．
大家估唔估到我阿媽要我為佢做　ｄ乜呢?? 俾大家估下啦!!
如果身理無問題，　聽日都會繼續去游水ｏ架．　如果游唔到都會去跑步ｏ架!!　ｋｅｅｐ　住　ｋｅｅｐ住!!!

報團

2007-10-06T19:26:00.001+08:00

我都好多年無坐飛機去旅行喇! 01年身體出現問題之後只係去過大陸去澳門玩咋!! 飛機都好耐無坐過, 主要都係體力問題, 做完幾次手術之後都完氣大傷, 出外玩都幾吃力, 所以一直都唔敢去旅行, 一直都好羨慕 d 朋友去旅行, 但係又覺得自己有心無力, 亦都怕去旅行o既時候因為體力不足會麻煩到 d 朋友, 所以要去玩多過兩日o既旅行都係無試過, 不過最近同 d朋友傾開計，　大家都好想去旅行，　我當然係其中一個啦，　見最近好似體力好返　ｄ，　所以我都參加埋一份，　將會ｏ係十月中同幾位好朋友去台灣玩四日，　我以前都去過日本，泰國同韓國，　但係台灣就未去過，　所以今次去台灣玩我都好開心ｏ架．　希望有力玩足四日啦!!!
今日就約ｏ左好朋友去報團，　其實最初諗住玩三日，　但係其中有一位好友話三日咁少，　最好可以去到四日啦!!　最後我地都報ｏ左四天團!! 　亦因為報ｏ左團，　我都諗住做返多　ｄ運動, 希望令自己o既體力好多, 到時去玩都可以有力玩, 唔希望因為我自己o既問題影响到身邊o既朋友. 希望大家都有一開心o既旅程!!!
加油, 加油!!! 希望到時唔使唱(上海灘)o既.....無力[玩]..無力再[玩].....

豆腐芝士蛋糕

2007-10-05T22:20:00.001+08:00

今日整O左個豆腐芝士蛋糕, 做法都係好簡單, 做O左出O黎白雪雪!! 滑LU LU, 真係好似豆腐一樣! 食落去有淡淡O既豆腐味!! 講真, 真係好清淡!! 食第一啖O既時候只係食到芝士味, 心諗點解無豆腐味, 但係食下食下就食到豆腐味, 不過係無乜甜味O既豆腐味, 可能因為係我用O左普通O既豆腐花, 即係無味果種, 下次再做要試試百福豆腐花, 應該會甜D. 不過下次先算啦. 哈...
材料:
餅底:
餅碎 70克
牛油 30克
豆腐芝士材料:
蛋糕片 1片
忌廉芝士 70克
糖 25克
豆腐花 180克
淡忌廉120克
魚膠粉 7克
清水 35克
做法:
1) 將餅碎加入已溶O既牛油拌勻再倒入模內壓實, 然後放入雪柜內雪凍.
2)先淡忌廉打至雪糕狀放入雪柜.
3) 忌廉芝士, 砂糖用打機打至滑身.) 再將豆腐花加入忌廉芝士內再打一陣.
4) 將雪柜內O既淡忌廉取出慢慢加入豆腐忌廉芝士內拌勻.
5) 將魚膠粉加入清水坐溶.
6) 將魚膠水加入豆腐芝士漿內快速拌勻.
7) 將蛋糕片放在掃上少許豆腐忌廉O既餅底上. 然後將所有豆腐芝士倒入模內. 再放入雪柜雪三, 四個鐘.

完成, 食得!!

P.S: 由於豆腐會不停出水，　有　ｂｌｏｇ度話將　ｄ豆腐拖一拖熱水先, 等豆腐d 水份出緊d, 但係我果 d 豆腐花散收收, 所以無咁做, 只係倒哂豆腐花流出o黎o既水咋!!

換o左喇!!

2007-10-05T09:09:00.000+08:00

早排睇到有blog友話買雜誌再加錢就可以換到以上呢本(名廚. 甜吅) o既書喇!! 本書原價話賣 118蚊, 不過依家只要兩期 U MAGAZINE 入面O既印花再加18蚊就換到呢本書O架啦!!!! 我呢個星期換O左喇~ 大家有興趣都去換返本啦!!

蜜糖吐司&煮返幾味!

2007-10-03T21:46:00.000+08:00

今日又再試做吐司, 由於上次焗到燶o左!! 所以今次再試多一次, 今次我加返個蓋o黎焗, 所以個頂無燶喇!! 哈... 不過唔知係咪 d 蜜糖落得唔夠多, 所以都係唔係好夠甜, 而且唔係好覺蜜糖味!! 下次再加多少少先至得~ 不過個包無焗燶已經好,開心o架啦!! 下次再試下其實味o既吐司先至得!!

分三份放埋一齊.

加返個蓋先.

焗好喇!!! 哈...

切開一片片先!! 足足有一磅o架!

今晚煮o既青炒青瓜.

煮 mor皮魚.

仲有炸雞亦呀!!

同欣欣飲茶

2007-10-03T21:39:00.000+08:00

今日好友都係請假帶女返學, 所以就約我去飲茶, 欣欣今日o係學校o既窗口望到好友同袓母, 好友同奶奶即閃, 欣欣見唔到好友佢地即刻喊到死死下!!! 到好友接佢放學睇到欣欣鼻哥個眼都喊到紅哂~~ 真係慘!! 不過無法啦!! 呢個都係一個過程!! 遲 d 就會習慣o架啦!
欣欣o黎度就繼續食o野, 欣欣最鍾意食包, 唔使一陣就將個雞包仔 d 包包食哂啦!! 佢又好鍾意飲水, 唔使你記佢自己都不停o係度飲, 真係搞笑! 之後坐到十一點左右我都走啦. 不過都未離開個商場好友就打電話俾我, 我仲以為乜o野事, 原來佢話大導演許安華o係度同 d 工作人員傾緊o野, 仲見到有 d 拍攝o既儀器, 可能o係度取景, 唔知拍乜戲呢??? 本來都想拎個相機出o黎影, 但係又好似好核特咁, 最後都係費時影走人. 哈..

欣欣返學喇!!

2007-10-02T14:28:00.001+08:00

今日好友一早打電話O黎話佢個女今日開始返BB班, 佢同佢老公就請O左半日假, 話想約我食晏, 仲有佢有袋貓沙都無用O架啦, 順便俾埋我, 於是就約我O係佢屋企附近食, 我當然無問題啦~
今日見到佢地個乖女欣欣又大過O左少少啦..依家兩歲, 無見一個月, 今次見佢就講多O左好多O野!! 欣欣成日都笑, 好得意, 我一O黎到佢就叫我姐姐, 真係乖!!! 今日係佢第一日返學, 雖然最初只係返個幾鐘, 不過遲 D 就會返幾個鐘O架啦, 希望佢適應到啦!! 聽好友講欣欣今日返學無扭計, 見佢都有同小朋友玩. 我諗佢都應該適應到O既!! 加油呀!!! 聽日好友都會請多半日假, 聽日會再約飲茶!! 到時又會再見到欣欣O架啦!!!! 欣欣, 聽日見喇!!!

表妹生o左個女啦!!

2007-10-01T23:28:00.000+08:00

今日出油麻地廣華醫院睇表妹, 因為佢尋日o岩o岩生o左個得意可愛o既囡囡, 即係我o既表姨甥女, 而我終於都變成表姨媽), 係姨媽呀!! 哈.... 今日去醫院睇佢, 晏晝得一個鐘頭探病時間, o黎探表妹o既人又多, 每次又只可以兩個人入去探佢, 所以車輪轉咁, 我只係入去幾分鐘就要拿拿聲俾下一手人入去睇表妹同 bb, 就o係呢幾分鐘馬上拎個相機出o黎同佢影相, bb女個樣大多數人都話似爸爸, 不過我就覺得似表妹, 不過都無所謂啦!! 最緊要 bb身體健康, 快高長大,
bb..bb..乖!! 記住要聽爸爸媽媽話呀!! 表妹聽日都出院啦.. 到時去佢屋企再同bb玩!!

攰 . 熱之行

2007-10-01T22:49:00.001+08:00

刺生蝦好好味!!

豬扒, 好味!

唔記得叫乜夕, 不過麻麻地, 一個字 [淡]

呢款都一樣麻麻, 都係淡.

法輪公.........無話可說....-_-

勁多人...-_-

拉埋 banner.....-_-

忠僕號

上船位置

一進入船已經係黃昏.

船裡面所賣o既書, 睇落好似好多, 其實唔係.

行完都天黑, 不過影得好差...

尋日原本約o左好友去屯門食晏, 但後o黎個 friend 話不如o係屯門食完晏之後就再到尖沙咀馬頭逛, 因為想睇睇果艘[忠僕號]

忠僕號於1914年建造，是一艘被健力士世界紀錄認可為現仍運作中的最老客船，也被稱為「世界最大的海上書坊」。該船計劃於2010年正式退役。

好友話好想去睇睇, 順便買書, 於是就o係屯門食晏先. 我地都係去o左 [小曼谷]食, 今次叫o左蝦刺生, 香茅豬扒, 菠蘿海鮮炒飯等等...個蝦刺生勁正, 而且好平, $ 40 有一碟, 一碟有10隻蝦, 勁底呀!!!! 又生鮮, 又好味!!! 豬扒都好好食, 不過 d 炒粉麵飯就唔係咁好食, 淡得制, 又無乜料咁!!! 食飽飽之後就坐小巴去佐敦(因為無直車去到尖沙咀, 坐果程小巴真係想嘔, 個小巴左fa右fa, 又坐得耐, 去到佐敦個胃都差不多反o左出o黎, 越辛苦, 去到佐敦就再行去坐巴士去尖沙咀, 點知行o左都冇兩分鐘就聽到打鑼打鼓o既聲, 又睇到有好多交通警, 心諗...發生乜o野事呢?? 再望過去好似遊行咁, 有一條好長好長o既人龍, 又有人打鑼打鼓, 又有人叫口號, 之後聽到我個 friend 講話係 d [法輪公] 嘩........乜咁大震像呀!!! 我諗果度都有幾百人遊行, 我都係第一次見到咁o既場面, 我個 friend 話佢o係中環果邊都見過, 又係咁誇o架!!!! 見到果 d遊行ｏ既人有老有後生ｏ既，　我地睇睇下仲有個阿姐走埋ｏ黎派ｏ左一份好似報章咁ｏ既ｏ野同ＶＣＤ俾我地，　我地好奇之下都攞Ｏ左份睇睇，　不過都係想俾屋企人八下，　俾佢地睇完都馬上掉Ｏ左佢！！！　唉．．．都唔知攪乜鬼!!!! 　我地八完之後就坐巴士去尖沙咀，　去到搵Ｏ左一輪終於都搵到排隊上去睇果艘船，　不過都排Ｏ左差不多一個鐘，　上到船先發覺艘船無想像中咁大，　裡面Ｏ既書九成都係英文書，　好大多數都係　Ｄ小說, 聖經, 兒童書籍, 唔O岩我睇, 不過最後都買O左好多本BB睇O既學中英文字O既書仔, 諗住俾我三個姨甥女同侄仔侄女O既. 希望佢地鍾意啦!!! 不過果艘船賣書果一PART係無冷氣O架....熱到你死呀!!! 人又多, 地方又細, 你都咪話唔辛苦呀, 一路行都聽到 D 人話頭暈呀!!! 咁鬼焗, 唔暈就奇!!! 之後買完書就O係船度影O左少少相就走人去食O野!!!!
尋日行O左六, 七個鐘, 真係又辛苦又臭....因為真係好熱...出O左好多汗...想去睇O既朋友最好帶多兩支水呀!!! 仲有帶多件衫呀.

BBQ

2007-09-30T11:02:00.000+08:00

燒雞亦, 我自細鍾意食.

影埋呢張個相機就無電啦....

尋日約O左幾位好朋友去小欖燒烤場BBQ, 由於約得早, 我地約O左兩點幾O係果度等, 烈日當空, 估計當時都有三十度, 之後起埋個爐就熱上加熱, 簡直焗爐一樣, 一個二個熱到流哂大汗, 都唔知為乜?? 哈... 早知就約晏少少, 之後到O左四點幾就開始無咁熱, 諗住拎埋個相機去海邊影下日落, 點原來果個相機已經無乜電, 唉..影O左兩張相就已經自動關機, 跟住以為自己好醒拎埋舊後備電出O黎諗住再影, 點知舊備電都係無哂電O架啦...真係失敗, 相影都無得影, 於是係咁E O係個海灘行O左一陣又返去再燒O野食, 燒呀燒呀燒, 燒到七點幾都夠哂皮, 我地又心血來潮想去深井食糖水, 於是就坐言起行坐巴士去深井, 一去到就見到間發記, 好彩仲有位, 拿拿聲坐底叫O野食, 其中叫O左一客榴槤班戟最正, 實在太好味啦... 於是走O既時候都買O左一份外賣返屋企俾阿媽食. 哈... 分甘同味呀麻.
返到屋企阿媽試過都話好味~~~ 正呀!!! 其實我都好少去深井食O野, 下次都要再約 D FRIEND 去試其也O野!!

又係意粉

2007-09-28T23:08:00.001+08:00

今日o既午餐又係食意粉, 由於上次唔夠咸, 所以今次加返多少少鹽, 味道真係好o左好多, 加埋 d腸仔，　火腿，　豆角，　ｍｍ．．．好味道．　下次再煮意粉一定要加返　ｄ芝士粉先至得!!! 我諗會更好味呀!

八月十六追月夜

2007-09-26T22:05:00.001+08:00

今日係八月十六, 話咁快就係追月夜, 好難得今晚影呢張夜影o既時候, 可以影得咁定無手震, 今日又咁好天, 你睇個月亮幾靚, 又無雲, 如果可以去埋 BBQ就正喇!!

中秋節快樂!!!

2007-09-25T22:09:00.001+08:00

中秋節快樂~~~~~

今日係中秋節, 家姐佢地會過O黎屋企食飯, 我就早幾日買O左個吐司模, 好想整俾家姐試試, 所以順便試做, 不過好可惜....... 照返一 D BLOG友講O既方法去做, O..NO..話焗吐司要三十分鐘, 於是就跟啦..不過焗到廿幾分鐘個包面已經燶燶地... 我即刻拎出O黎睇睇...面已經燶O左啦. 唉.. 我 D 心血呀... 下次再焗..焗廿分鐘左右都夠. 雖然今次失敗O左, 不過都算係一個經驗, 話哂都係第一次整掌聲唔到都不為過, 下次再試過!!! 之後家姐O黎到就俾佢地試試啦, 味道淡O左少少, 唔係好夠甜, 不次要加多少少糖先至得!! 家姐O黎度之後就幫手阿媽煮餸, 中秋節一家人一齊食飯就最開心. 不過家姐食飽飽坐O左一輪又要返奶奶屋企做節, 真係忙呀!!! 兩個姨甥女去麻麻果度都好開心, 因為大把唐家姐, 唐哥, 唐細佬同佢地一齊玩, 一定好玩過O係我度屋企呢度啦!!! 好啦!! O係呢度再一次祝佢地同大家都中秋節快樂!!!

初初焗o既時候仲似模似樣o架!!

不過之後焗過火.............黑面神.

雖然佢面黑黑, 但係內裡都見得人o架.

阿媽整o既開邊龍蝦仔. 好好味呀!

過節又點可以無雞呢!!! 家姐切o架, 我就唔識切啦!!

腰果西芹

煎魚餅

梓齊滿月喇!!

2007-09-24T20:08:00.001+08:00

尋日係表哥個仔仔滿月o既大日子, 表哥請o左我地一家人同埋好多親朋戚友o黎飲呀. 都擺o左四圍酒o架. 其中小朋友o既數量都唔少o架, 所以好熱鬧!! 我就拎住部相機呢度影下, 果度影下, 影低呢個快樂o既時刻, 表哥o既仔仔好得意, 十足十表哥, o岩o岩滿月已有十磅重啦!!! 不過尋晚佢好乖, 成晚都訓覺, 其實都好嘈o架, 不過佢都訓得好冧, 就算到佢醒o左都一樣無扭計o架!! 眼仔碌碌好得意!!! 不過同小朋友影相真係好高難度, 因為小朋友周圍走, 又唔會坐定定俾你同佢影相, 所以轉怕 video, 起碼無難度先, 點影都得!!!
尋晚大家都相當高興, 熱熱鬧,餸菜亦相當豐富, 最緊要係好食呀麻!! 大家都食得勁飽!!! 不過我都係覺得我自己唔係好夠主動, 應該再主動 d 影多 d 相. 咁先至可以更加全面o既將尋晚o既快樂時光全部都留低呀麻!! 不過唔緊要, o黎緊亦都係表弟o既滿月酒, 到時再影過!!!
o係呢度都祝表哥o既仔仔梓齊身體健康, 快高長大, 聰明伶俐, 孝順父母, 開心快樂!!!

小曼谷

2007-09-23T08:56:00.000+08:00

小曼谷

柚子蝦沙律, 好味道, 不過得三隻蝦, 好似少過頭喎!!

雜錦金邊粉

豬頸肉金邊粉

送o既龍眼冰, 唔會太甜, 好好飲!

今日約o左好朋友屯門o既[小曼谷]食晏, 不過個 friend 有遲o左收工, 所以差不多三點先去食晏, 應該話食下午茶, 去到鋪頭客人唔係好多, 可能呢 d 時間比較靜, 我地一坐低o野都未叫, 有個阿姐已經送上兩杯凍飲!! 我地以為阿姐送錯o野即刻同阿姐講我地未叫o野喎!! 阿姐話龍眼冰送o架!!! 我地心諗{乜咁好呀??!!} 不過又無問阿姐係咪下午茶都有o野飲送. 算啦....唔使錢無所謂啦!! 不過杯龍眼冰又真係幾好!!! 之後我地就叫o左兩碗粉同一個{柚子蝦沙律} 兩碗粉都無乜特別, 味道正正常常啦, 不過個柚子蝦沙律就好好味~ 甜甜地辣辣地!! 好開胃, 其實我個 friend早幾日前都ｏ黎食過晚飯，　佢話幾好食，　所以今日就ｏ黎試試，　仲有呢間ｏ野　ｄ　價錢都幾平ｏ架．　真係值得去試試!!!

阿寶

2007-09-21T09:17:00.000+08:00

腸仔意粉

2007-09-20T14:52:00.000+08:00

我都好耐無煮過意粉o黎食啦!!! 今日晏晝又唔知食 d 乜好, 所以就煮o左呢個腸仔意粉, 事關雲柜都無乜特別既材料, 所以就簡簡單單整o左呢個意粉囉. 不過好似淡o左少少!! 不過鍾意淡淡地o既我, 無所謂啦!! 淡少少都接受到!

酥皮忌廉湯 & PIZZA

2007-09-19T15:01:00.001+08:00

早兩日心血來潮好想整 pizza, 於是今日就試一試, 其實以前都整過一次, 不過可能個皮整得太厚, 個 pizza 焗完出o左都個皮都仲有 d 唔熟, 所以今日整呢個 pizza就整薄 d, 唔好太厚, 費時又唔熟啦!! 不過焗完之後好似 d芝士落得唔夠多，　下次再做要落多ｄ先至得!!! 　不過焗出ｏ黎都幾好味ｏ架! 　另外，　亦順便整ｏ左個酥皮湯，　做法超簡單，　因為我都係用即用ｏ既酥皮，　乾手淨腳，　煲完個忌廉湯蓋上酥皮焗一運就搞掂，　不過我太貪心，　ｄ　湯加得太滿，　當個酥皮焗到咁上下，　ｄ　湯就流哂出ｏ黎，　真係洗死我，　所以下次再做唔可以加得太多湯．　

呢個就係我今日O既午餐啦!!! (其實我係食O左兩件 PIZZA O架) 哈!

其實我今次係用PIZZA粉o架!! 唔係自己用高筋粉整O既PIZZA, 不過見買O左一段時間, 唔再用遲早過期呀!! 所以唔算係100%自家製做.

焗好啦. 好味道呀.

煲好個忌廉湯先.

加埋酥皮.

又焗好啦.

又係好好味~~

煮幾味

2007-09-18T08:06:00.000+08:00

阿媽又返o左大陸, 所以煮飯o既任務就交俾我地去做, 尋晚就由我煮, 其實煮餸唔係好難, 最難就係諗煮乜o野餸, 每一次諗煮乜o野餸都係好頭痛, 由於唔食牛, 所以又少o左一 d 選擇, 尋晚就煮o左魚肉釀三色椒, 豆腐九肚魚湯同埋節瓜煮草菇, 煮得ok o架. 哈... 今日阿媽返香港, 不過都要五點幾先返到, 所以我都會買定餸, 唔知又煮乜o野餸好呢??

表弟O既 BB 女出世啦!!!

2007-09-17T17:21:00.000+08:00

今日去O左醫探我表弟嫂, 因為佢尋日O岩O岩生O左BB啦, 女O黎O架, 同我表弟個樣好似O架!!尤其是雙眼. 不過依家去醫院探人每次最多只可以兩個人入去探, 其他人就要出面等, 今日除O左我仲有我表弟, 阿姨, 同表弟嫂O既親友, 所以我地幾個就好似車輪轉咁, 呢個入去睇一陣又要果個入去睇一陣, 我今日都帶埋個相機去同 BB影相, 仲拍O左少少 VIDEO. BB 出O左世都係一日左右, 但係已經眼碌碌周圍望, 真係精靈, 由於只係得果一個鐘頭探, 所以差不多一點就要走人啦. 表弟嫂都今日出院啦. O係呢度祝佢同BB都身體健康, BB快高長大, 聰明仱俐

惡死神仙魚

2007-09-17T08:49:00.000+08:00

尋日約o左好友去旺角行街, 因為好友想買牛仔褲, 最後好友買o左兩條褲, 而我亦買o左兩條, 哈...真係開心, 之後我地去o左金魚街睇熱帶魚, 因為之後屋企養果 d魚仔買少見買少，　都係時候入返　ｄ貨, 所以順便去睇埋. 由於揀d唔會打交ｏ既魚，　選擇亦都少ｏ左，　最後都係揀返紅燈，　神仙同埋迷奇，　買ｏ左三大包．　返到屋企拿拿聲將三包魚放入魚缸度　等ｄ　魚適應水壓，　過ｏ左幾個鐘頭之後先將　ｄ魚倒出o黎, 不過養o左好耐果條神仙魚可能一時間唔適應多o左咁多魚, 不停咁追 d 新魚o黎叮, 到o左今朝發現死o左一條紅燈, 不過死一條都算係好好彩, 相信o黎緊呢幾日都仲有魚會死, 希望唔好死咁多啦!!!

阿寶好好打

2007-09-15T10:43:00.000+08:00

阿寶越大越好打, 我想行近少少都唔得!!! 唔相o既話大家睇睇. 不過阿寶以自己好勁, 其實係豬頭炳, 哈...

湯種南瓜包

2007-09-13T09:32:00.000+08:00

南瓜包

裡面有南瓜肉同葵花杍o架.

呢 d 就係湯種.

差成麵糰.

做型.

焗好啦.

尋日又做南瓜包，　其實之前都做過，　不過因為我鍾意食南瓜，　所以又做呢款包包．　上次係跟ｂｌｏｇ友魔人布歐ｏ既方法做，　今次偷懶唔跟佢ｏ既方法，　佢係分別做兩種麵糰（南瓜味同綠茶味），　我只係做ｏ左南瓜ｏ既麵糰算啦．．懶呀．．．．．．．．．　求期掃　ｏ左　ｄ　綠茶水上去個麵糰上面當係南瓜表面果塊皮算．　哈．．．　最後焗出ｏ黎都唔係好覺　ｄ綠色紋.偷懶就係咁o架啦...

材料: 11個
高筋粉 320克
糖 60克
蛋半隻
酵母 5 克
水50克
南瓜 250克(隔水蒸煮)
牛油 15克
湯種 80克( (70克熱水加15克高筋粉拌勻待涼即可使用)
南瓜餡
南瓜 (我唔記得磅呀..我諗大概200克左右)
葵花子適量

做法:
1) 將酵母, 五克糖加入水中待五分鐘後用.
2) 高筋粉, 糖, 湯種, 蛋, 南瓜, 酵母水拌勻再搓, 搓至不黏手有彈性. 再將牛油加入再搓一會.
3) 將麵糰放在已掃油的盆上再蓋上保鮮紙發酵45分鐘. (大概麵糰發酵兩至三倍大)
4) 取出麵糰分成每份 60克左右. 壓平加入南瓜餡和葵花子收口. 在麵糰表面壓幾條紋, 做出南瓜o既紋路. 後又再放o係已掃油o既盆上面再蓋上保鮮紙發酵30分鐘.
5) 第二次發酵完之後, 掃上蛋漿, 用綠茶粉加少少水晝出南瓜紋, 焗爐以200度預熱.
6) 將麵糰放入焗爐以 200克焗10分鐘. 完成.

失控

2007-09-11T10:51:00.000+08:00

阿寶越大越痴線, 唔使同佢玩佢都會自己一個O係度發癲. 我影O左佢失控O既情況. 其實成日都會見, 我地已經見慣. 我都好佩服有 D 人可以養好多隻貓貓, 如果幾隻貓一齊咁樣玩O既話, 真係頭都痛埋.

參觀新居

2007-09-09T08:41:00.000+08:00

盈盈你好嗎?!

尋日o係CONNIE屋企整O既包.有腸仔同吞拿魚同埋一個俾盈盈食O既齋包包.

我地叫O既蕃茄豬骨湯底.

尋日去o左參觀好友o既新居, 順便去同好友個乖女盈盈玩, 話咁快盈盈都八個月大, 肥do do 好得意, 眼仔碌碌, 對於我地呢班姐姐好好奇, 續個續個望, 睇到眼定定. 真係 cute, 不過今次去好友屋企, 亦都係o黎整包包俾佢地試, 包包都係即整整食最好味, 不過我有朋友話我整個包要幾個鐘頭, 都晤知為乜?? 哈...係呀, 真係唔知為乜o架. 為興趣囉. 唔通為世界和平咩!!! 有時人就係咁o架啦. 做好多o野都唔知為乜, 總之唔好傷害人, 唔好做壞事咁咪得囉. 做完自己開心咪ｏｋ　囉．　
之後我就o係度做我o既包, 好友就係度打麻雀, 各自各精采, 尋日都算快手o架啦, 三個鐘頭就做好 d包包，好友試過都話好味，　哈．．．　話哂都係新鮮出爐，　熱辣辣緊好味啦~ (因為都係用湯種做，　所以又係超軟) 試完包包坐多一陣就出發去小肥牛大邊爐，　天氣開始有少少轉涼，　最好不過就係打邊爐，我地去到小肥牛已經見勁多人客，　　好彩之前　ｂｏｏｋ　ｏ左位，　唔係去到都有排等呀．　尋晚都食到好飽，　不過我就覺得味精好似多ｏ左　ｄ　ｄ．　不過出街食飯都預ｏ左係咁ｏ架啦．．．．　食飽飽就各自散啦．　我都好眼訓啦....快 d返屋企沖涼訓覺．．．　

湯種芝麻餐包

2007-09-07T16:54:00.000+08:00

新鮮出爐湯種芝麻餐包

搓好麵糰發酵完第一次再做型.

第二次發酵亦完成啦.

拎去焗先.

焗好啦. 好靚呀.

開佢再加 d 芝士, 蕃茄, 火腿, 沙律漿. 大工告成.

之前成日上網見到一d blog友話用湯種o黎做包包, 可以做出超軟o既包包, 我都好想試下呀. 於是今日就試試啦. 不過其實見d blog友多數用湯種o黎做 d吐司，　不過我都無做吐司ｏ既模，　所以求其整個芝麻餐包試一試先．　另外，　亦ｏ係網上睇到有位　ｂｌｏｇ友做湯種o既超簡易方法, 不過真係唔好意思, 我唔記得o左果位blog友個blog呀??? 不過我就有寫低 d成份同做法．　　果然用湯種做出ｏ黎ｏ既包包真係好軟，　而且方便個用老麵，　所以第時我再做包，　都會用湯重取代老麵．　　
不過做完個芝麻餐包之後，　又好似悶悶地，　所以都係加埋　ｄ　蕃茄，　芝士，　火腿入去．　嘩．．．．真係實在太好味啦．　食完包都飽哂~~~
材料: 8個
高筋粉 250克
糖 30克
酵母 5克
牛奶 110克
牛油 20克
奶粉 8克
蛋大o既半隻
湯種　80克(70克熱水加15克高筋粉拌勻待涼即可使用)

裝飾:
芝麻適量.

做法:
1) 將五克糖, 酵母加入奶中待五分鐘後用.
2) 高筋粉蒒好再將糖, 奶粉, 湯種, 蛋, 牛奶酵母拌勻再搓至不黏手及有彈性. 然後才將牛油加入再搓一會, 跟住將麵糰放入已掃油o既盆內,再蓋上保鮮紙發酵45分鐘.)
3) 取出麵糰壓平切開八份(每份約60克), 做型, 掃上蛋漿, 再加入芝麻, 然後再放o係盆內, 再蓋上保鮮紙作第二次發酵.
4) 第二次發酵完成之後, 將焗爐以200度預熱幾分鐘.
5) 麵糰用200度焗10分鐘. 完成.
P.S. 我發酵麵包O既方法係將焗爐調至最高溫大概一分鐘左右熄火, 然後將蓋上保鮮紙O既麵包放入焗爐內發酵, 咁樣會發酵得快 D．　溫度夠就唔怕包包發唔起啦)

去食齋

2007-09-06T17:41:00.001+08:00

今日去O左佛堂食齋, 係因為佛堂有好多姑娘O黎諗經, 而諗經O既原因亦都係超道 D 亡魂其實已經諗O左幾日經O架啦. 今日好似係好大型O既化寶, 亦有齋食, 我阿媽叫我今日去食齋, 所以下晏就去O左佛堂, 不過可能今日唔係紅假, 學生亦都要返學, 所以到佛堂O既人並唔多.
每一次去佛堂食齋, 都會見到擺滿一台O既齋菜, 其實真係好誇張. 唔信大家可以睇睇相. 每一次都食唔哂, 不過食唔哂O既都會叫 D善信扲　Ｄ　返屋企Ｏ架．　　其實我都懶Ｏ左好多，　都少Ｏ左去佛堂．　真係唔應該呀!!!!　而佛堂裡面有位姑太已經有九十幾歲Ｏ架啦，　希望佢身體健康，　平平安安．

GRACE樂園

GRACE的重要啓示!!!!!!

絶育後的第二天

難涯o既一晚

阿寶返屋企喇!

向獸醫診所出發

阿寶過多十幾廿個鐘就會變[公公]

喬喬movie

好有性恪

又執平O野!

阿寶都頂我唔順, 哈...

阿寶以為自己好醒

吞拿魚蘑菇沙律包

封信子

覆診

睇醫生

大傷風

聖誕打邊爐

聖誕寶寶

元朗西鐵燒烤樂園

與阿寶對話

第三日拎O野去診所

第二日交ｏ野去診所

多謝家姐

睇醫生

又係佢呀 - 綠茶紅豆芝士凍餅

白行

阿寶心情好

神棎 , 阿寶新屋

流浮山之旅下集[水邊圍]

流浮山元朗萬無目的一日遊上集

BROWNIES & 板前

12月的寶寶

芝麻包

有消息喇!

同媽去睇醫生

火腿香蔥包(湯種)-附食譜

多事之sunday

好驚呀!!!

杏仁曲奇

當床訓!!!

又去佛堂食齋

薏米腐竹蛋糖水

肥姐你要加油呀!

屯門咖哩

好平呀!!

阿寶好似...[屎]o左咁!! 哈..

阿爸阿媽返喇!!

阿寶你可唔可以乖d呀.

蜜糖鬆餅

十一月生日之星

沙律包

十一月的阿寶

欣欣， 喬喬

表妹囡囡擺滿月酒

十一月的阿寶

涼涼地

阿嫲走o左喇.

媽媽六十大壽

台灣之旅- 第四天

台灣之旅第三天

台北之旅第二天

台灣之旅第一日

返o黎喇!!

聽日飛喇!!

第三支防疫針

珩珩生日

阿寶又大過o左少少喇!

無再打o黎喇!

飛錯線

十月生日之星

650米

加油， 加油!!

報團

豆腐芝士蛋糕

換o左喇!!

蜜糖吐司&煮返幾味!

同欣欣飲茶

欣欣返學喇!!

表妹生o左個女啦!!

欣欣，　喬喬

加油，　加油!!