GRACE樂園: 08.2005

2005年8月31日

天恆村有人中o左日本腦炎

好驚呀....我o係果頭住o架............其實呢排好都小見到d大大隻o既蚊, 不過間唔中都有俾蚊仔針到...好驚呀...呢個時世真係得人驚, 唔係呢樣病就係果樣病.....

原來可以叫隻雀仔飛去日本唔同o既地方, 到o左果 d 地方之後, 隻雀仔會o係果個地方影相, 而一 d 玩o野呢個遊戲o既綱友可以o係你o既相片留言, 都幾得意. 有冇興趣裝呀??
o係呢個綱度有教點樣裝.
http://blog.webs-tv.net/slk230/article/425303#comment375591
呢個綱都教幾多o野, 我實在太out, 所以對我o黎講好新鮮, 知多d o野呀~~

雀仔

今日無意之中入o左去一個台灣o既綱頁, 入面都幾多o野睇, 有教一d做綱頁o既知識, 而入面有個公仔係隻雀仔o黎, 都幾得意.好似養雞仔咁, 所以試o下整, 不過都試o左好多, 好多次先至成功...不過都唔係好知點玩....唔知會唔會玩死佢...

2005年8月30日

我的童年照

呢兩張都可以話係我既珍藏, 咁細個o既相應該都係得呢兩張. 不過細個o既時候無幾可有得影相, 呢兩張相都好似被迫影咁, 笑都唔笑o下...哈...(BB果張, 無法啦, 都唔知發生乜O野事)

BB

上個星期日去O左朋友屋企睇BB, 個BB好肥, 依家四個月, 不過都差不多廿磅, 好勁呀!! 依家都飲成八安奶, 真係好誇張. 其實呢一, 兩年身邊都有好多朋友生BB, O黎緊O既十一月同下年一月都有朋友生BB呀. 所以話 D 人唔生BB都唔係呀, 都有好多人生呀!!!不過身邊O既生女多過生仔.

古巨基 - 天才與白痴

唔知點解一聽到呢首歌就好唔鍾意, 句句都係"這個白痴.......", 呢d歌詞聽到令人好唔舒服, 如果你屋企好不幸有個成員係智能上有d問題, 每一次聽到呢首歌, 不停唱o黎唱去都係"白痴, 白痴", 我諗會好唔開心, 有時作一首歌想有人留意, 唔需要用呢d咁令人敏感o既歌詞, 不如用d腦諗多d令人感動o既歌詞啦. 以前八十年代o既歌詞有意思好多.

2005年8月29日

圖書館

今日行去圖書館, 諗住借書睇, 嘩....人多都不特止, 想搵本o岩睇o既書都無, 行去諗住借赤川次郎o既小說, 點知得返兩本, 仲係唔o岩睇o既,真係老土, 好日都唔行去借書, 點知白行!!!不過天水圍個圖書館真係好細....元朗又無圖書館, 真係唔方便!!!

2005年8月27日

兒歌金曲

今晚電視機實在真係無o野好睇, 又知道欣宜會o係兒歌金曲度有表演, 就係因為好奇....所以就睇睇, 其實欣宜唱歌都真係叫唱得幾好, 不過當時係錄音表演, 但係一見到佢個樣....我唔係話佢核特, 只係覺得佢好做作, 一路睇一路有種作嘔o既感覺.....唔知點解, 不過真係有 d 反胃..我都諗過以後佢 d 表演我都盡量唔好望佢個樣, 應該下次唔會作嘔o架啦....

2005年8月26日

ALIVE

ALIVE
成員包括吳彥祖、連凱、陳子聰及尹子維.
我覺得佢地四個真係好搞笑, 亦都好正啦. 唱歌唔好聽唔緊要, 要緊要開心!!
四個人當中我最鐘意連凱, 哈...
官方綱頁
佢地 D 歌係任人 DOWNLOAD O架!!! 唔係犯法O架.正呀!!!
佢地O既歌 : 阿當的抉擇

依家係乜O野世界...七歲都俾人斬!!!

有冇人性O架................連一個七歲O既小朋友都斬!!! 希望警方能夠快 D 將D賤人捉到. 呢D人要落地獄呀!!!!!!! 亦都希望個小朋友快 D 好返!!!!

點樣大愁口, 都唔好要 D 小朋友受. 大人O既事大人受, 一人做事一人當!!!!真係不知所謂!!!!

2005年8月25日

唱到聲嘶力竭

今日自己錄O左兩首歌於O左上去 SOOFF.COM, 不過都唱得麻麻地, 得啖笑, 哈....
不過都好耐無唱過K, 搵日都約O下朋友唱唱先, 等我都聽多D 歌, 記O下 D 歌詞先, 唔係去到想唱又唔識唱, D字又追唔切....

2005年8月24日

生"飛知"

早幾日個口生"飛知"(唔識打), 痛到爆炸.....仲要生o係d鬼祟位, 連"查"樂藥膏都好高難度...而且粒"飛知"仲唔係細粒...........好痛呀...... 我諗都要多幾日先至好................ 大家有冇 d 勁有效o既醫治方法呢??? 有就唔該提拱一下啦, 唔該...........

2005年8月23日

做任何事都要想清楚

有時做人好迷?......
每做一件事, 作出任何一個決定, 之後得出o黎o既後果, 無可能100%知道清楚, 但係相信起碼有50%你係知道, 人係好自負, 亦都係好沖動, 覺得做完決定之後, 就算個後果係點, 我都係承受得到, 亦都唔會後悔, 呢 d 係咪叫"執迷不悔"呢........ 但係到問題真係出o左之後, 痛苦o既最終都係自己, 所以每做一件事, 唔止為自己諗, 亦都要為身邊o既人諗.
所以作任何一個決定, 俾多小小時間自己再諗清楚d. 要知道最終係"(得)o既多, 定(失)o既多.

2005年8月21日

條街實在太多人啦...

今日去屯門吉之島行, 實在太多人啦....本來星期日已經勁多人, 可能天氣唔好, 又落雨, 令到個商場更加多人, 真係行都無心機...

不過出街都要著多件衫, 天氣涼涼地, d冷氣依然咁大, 隨時感新, 所以帶多件衫o係袋到好d, 唔係見涷都無得著.

2005年8月20日

有冇咁多雨水?!

今日一早起身, 又係落雨, 出門口又係落雨, 坐車又係落雨, 食晏又係落雨, 行街又係落雨, 返屋企又係落雨...............幾時先至停呀...
真係 "大陽伯伯, 太陽伯伯, 你去o左邊, 你去o左邊, 快 d 快出o黎......... "

2005年8月19日

養寵物..

布甸，你知唔知點玩呀？？全都係日文，唔知講乜．．．．
http://meropar.jp/

2005年8月18日

煩

做人有時真係好煩....
煩生活 !有錢又怕俾人知道, 無錢又怕俾人知道!
煩感情! 有人愛又煩, 無人愛仲煩!
煩健康! 小小事又怕變大件事, 大件事又怕係咁先!
煩家事! 煩阿爸阿媽日哦夜哦, 到佢地無能力再哦你o既時候, 你仲煩!
煩工作! 有得做又怕辛苦, 無得做又怕永遠都無得做!

但係點煩, 生活都係咁樣過............用開心o既態度去煩啦!!
仲有, 我好信想, 就算偶到點煩o既事, 都係會過去,
時間係可以洗去所有煩惱, 有邊個人未煩過呀, 係咪!!不過都已經過o左去啦!

其實煩惱都係一個人o既生活回憶, 過多幾十年咪就係你同你 d 朋友傾計o既好話題囉!

譚詠麟/關淑怡新歌~舊情復熾

譚詠麟/關淑怡新歌~舊情復熾mp3~
舊情復熾.mp3
關淑怡巳經好耐冇新歌派台, 今次同譚詠麟合唱o既 (舊情復熾), 我本人就覺得幾好聽, 其實關淑怡唱歌非常有個人風格, 不過做娛樂圈呢行並唔易做, 希望今次呢首歌能夠為佢帶o黎一線新機.

今日係舊曆七月十四

好多人會o係路邊燒街衣, 所以最好早d返屋企, 唔好夜媽媽周圍走!!!

2005年8月17日

SKYPE綱上傾電話

SKYPE - 係一個綱上傾電話O既服務. 完全免費. 如果有朋友係住O係外國, 咁就好好用啦, 而且接收得非常清晰, 仲清過我屋企個電話. 裝O黎用啦, 超推介!!!!!不過除O左自己裝, 都要叫你 D 朋友裝先至搵到佢地O架!!!
http://www.skype.com/intl/zh-Hant/
可以同時間同幾個朋友一齊傾電話. 正呀!! 悶O既話, 仲可以 CALL D 外國朋友傾計~~

加返個人數計啦!!

終於搵返個位加返個人數計啦, 實在太難搵啦, 我諗都試O左十幾廿次. 我諗改完今次, 應該都唔會改住, 廢時自己搵 O野O黎辛苦.

2005年8月16日

LINKS - 加O左好朋友資料

今日將布甸同我家姐O既綱頁放O左O係我個綱O既 LINKS入面. 又係要多謝布甸啦, 之前我都唔知點整O既, 好彩有佢幫手. 唔該哂!!!

2005年8月15日

加o左一個瀏覽人數計數器

今日加O左一個瀏覽人數計數器, 不過唔知點解得個位數字, 唔係萬位數字, 家O下得一個位, 好似怪怪地咁..
我係由呢個綱度申請計數器. http://free4web.biz/

好慢!!

最近我自己個綱要一段時間先開哂. 唔知關blogger事定係加o左個鐘o既關係呢???

2005年8月14日

生炒排骨, 正!!

今日我家姐本來話O黎食飯, 但係後尾兩個女話唔O黎, 所以得返我地四條友食, 但之後當我阿媽煮好?, 我老豆又打返O黎話唔返O黎食, 今晚有我阿媽整O既"生抄排骨", 不知幾好食, 佢地唔返O黎食, 係佢地無口福. 另外, 阿媽都整O左個肉豆煮午餐肉, 原先佢話用紅燒豬肉, 不過太肥, 我叫我阿媽轉午餐肉, 都一樣咁好味. 不過得三個人食, 食唔哂~