2007年11月29日

有消息喇!

今日屯門眼科醫院打o左電話o黎喇!! 依家安排o左我阿媽12月中再去見醫生呀!!! 實在太好啦....如果要等到09年先見醫生就真係發霉啦..!!

2007年11月27日

同媽去睇醫生









家姐同阿媽果兩碗湯粉唔記得影....

今日同阿媽去睇醫生, 因為之前佢覺得隻眼睇o野有 d怪怪地, 其實一早都叫佢去睇, 但係又話好忙, 又話要o係佛堂幫手, 所以今日先至去睇, 去到醫生幫佢睇睇對眼, 我見醫生關o左燈用支o野照佢隻眼, 不過個醫生都照o左好耐.... 果刻我有 d 懷疑個醫生識唔識?? 之後個醫生話我阿媽講o既情況可能係視網膜o既問題, 幫我阿媽轉介去眼科果邊. 跟住我就同我阿媽去排期, 不過排期排到09年....仲要係8月, 不過個姐姐仔話睇下到時會唔會通知早 d 去見醫生, 所以暫時未知係咪真係要等到09年!! 不過我估多數都唔使咁遲o既!!
睇完醫生之後就約埋我大家姐一齊食晏. 我地去o左華都新開o既一間食越南o野o既鋪頭食, 間o野叫[西貢星], 因為我地都未試過, 所以就去試試啦. 不過我阿媽同大家姐叫果個湯粉都話好多味精又好咸唔好食, 而我叫果個海南雞飯就無乜o野. 另外叫o左客春卷, 都ok o既. 但係家姐話下次都唔會再o黎食, 佢話唔好食. 哈... 食飽飽之後就周圍逛, 我地由華都開始行, 中間行o左華都, 吉之島同新墟, 我地都買o左好多o野, 拎到手又攰, 腳又攰, 之後返到屋企阿媽即刻走o左去訓覺!!! 其實我都都好少三個人一齊去行齊齊, 所以今日雖然行得攰, 但係都行得好開心o架.
希望阿媽對眼無事啦!!! 最緊要個個都平平安安, 身體健康!!!

2007年11月26日

火腿香蔥包(湯種)-附食譜





今日想做包, 又唔知整乜包, 諗諗下不如整火腿香蔥包, , 於是就行動啦... 不過唔知係咪天氣涼..個包都發O左好長時間先發得起, 好彩到最後都幾滿意落去好香O既蔥味, 不過如果再加多D多D多D蔥就更加正.

材料:
高筋粉 270克
糖 35克
酵母 5克
牛奶100克
奶粉 8克
蛋 半隻, 另外半隻留返o黎掃包包表面)
牛油 20克
湯種 80克 (高筋粉 15克, 滾水 70克)

火腿, 蔥, 芝麻由自決定, 鍾意食幾多就落幾多啦.

做法:
1) 將五克糖, 酵母加入奶中待五分鐘後用.
2) 高筋粉蒒好再將糖, 奶粉, 湯種, 蛋, 牛奶酵母拌勻再搓至不黏手及有彈性. 然後才將牛油加入再搓一會, 跟住將麵糰放入已掃油o既盆內,再蓋上保鮮紙發酵45分鐘.)
3) 取出麵糰壓平切開八份(每份約60克), 加入火腿, 蔥做型, 掃上蛋漿, 再加入芝麻, 然後再放o係盆內, 再蓋上保鮮紙作第二次發酵.
4) 第二次發酵完成之後, 將焗爐以200度預熱十分鐘.
5) 麵糰用200度焗10分鐘. 完成.

2007年11月25日

多事之sunday

今日家姐過黎我地屋企食飯, 我地約O左去食晏先. 都係去返我屋企商場入面果間[七褔神]食飯.












食飽之後就返屋企整曲奇, 不過今日真係超失敗, 整乜都失手, 唉...整到無心機, 原本我係諗住即唧花曲奇, 點知唔唔知係乜材料搞錯O左, 麵粉落多O左, 搞到整唔到唧花曲奇, 靈機一觸, 不如整蛋撻啦...點知又唔知邊度搞錯, 焗好耐 D 蛋都唔熟, 究竟搞乜鬼呀....... 不過最後都搞O左好耐個蛋撻終於都熟啦, 但係後尾又發覺個撻皮好厚, D 蛋好薄, 又整得唔靚, O..NO...你搞乜鬼呀!!!! 之後因為仲有D材料用唔哂, 所以做埋曲奇, 不過當然唔係唧花曲奇啦..因為之前咪話O左失敗O既, 咪整 公仔曲奇囉. 好彩都叫做順利完成.

搞到頭都大埋o既蛋撻




乜都整好之後, 心血來潮想同阿寶影返張合照, 咪叫我二家姐幫我渣機影相囉..點知我二家姐影十幾張張張都唔清, 叫我大家姐影,佢又唔得閒,阿寶唔知係咪覺得煩,無啦啦獸性大發,失驚無神發狂爪O左我一下...好痛呀!!! 出血呀...皮開肉爛呀.....第一時間放低阿寶走去洗傷口呀!!!! 仲要俾我阿媽鬧, 真係無辜, 天理何在, 我係受害者O黎O架!!!! 真係慘!!!



事發前影o既相.(唔清)




事發後. 我真的受傷了.
完傷口之後都食晚飯啦, 今晚係由我家姐煮. 食完飯我阿爸拎O左個由佢自己整O既籠出O黎, 因為之前話想買個籠O黎FOR 阿寶沖涼用, 因為以前佢細隻都仲可以幫佢沖涼, 但越O黎越大隻, 要幫佢沖涼好高難度, 因為佢好癲, 所以都諗住買籠, 但我老豆話等佢自己整, 所以今晚O黎出O黎試下放阿寶入去睇下阿寶有乜反應, 阿寶好迷茫唔知發生乜事, 不過都係困O左佢唔夠五分鐘就放佢出O黎, 因為今晚都未諗住同佢沖涼, 所以唔使用個籠住. 睇O黎個籠都唔錯, 哈...下次幫佢沖涼都方便得多啦. 一定唔會再受傷啦..我講我唔會受傷, 唔係阿寶呀!!! 我老豆真係好好諗頭O架, 佢成日乜都自己整. 哈.




呢個就係阿爸做o既籠. 仲有主角阿寶.

2007年11月24日

好驚呀!!!

我尋晩發o左個好得人驚o既夢... 我發夢o係我舊居度, 見到阿寶o係度玩, 玩都癲o左周圍跳, 點知跳跳下跳o左去露台度, 點知唔小心跳o左落街呀...我發夢見到我自己經抻手去救佢, 但係都太遲....見住佢跌o左落街...仲聽到跌落街果o下[pa]一聲..嘩...好驚呀. 之後仲見到我阿爸返到屋企, 我就同佢講阿寶死o左呀! 跟住我阿姨又打電話o黎, 當然係發夢啦..我又同我阿姨講, 跟住有個friend打o黎, 我就忍唔住一路講一路喊....阿寶死o左呀.... 跟住我就醒o左啦...果一刻我即刻意會到我係發夢o者..不過真係好直實, 好驚呀.
唔知係咪以前聽講過有 d猫猫跌落街跌死...所以發埋d咁o既夢...真係好發唔發...依家個心都唔係好安樂.
我一醒o左就走去睇下阿寶, 佢一見到我就即刻走埋o黎, 睇見佢好地地當然開心啦!!! 因為真係發夢之麻...呢 d 咁o既夢唔發好過發呀. 真係嚇死...

2007年11月23日

杏仁曲奇


噔..噔..噔..噔...杏仁曲奇送到.

將所有材料(除o左雞蛋)拌勻再搓好.


之後先將雞蛋加入再搓.

差到咁上下就變成咁樣.
放入雪柜雲五分鐘.
用曲奇模cut出各款形狀.
用180度焗12分鐘.
聽日會約我d 朋友, 所以今日就整定 d曲奇, 聽日送俾佢地啦. 我都係跟〔Katy & Betty Kitchen〕 呢個網整o架, 大家有興趣可以入去睇睇.
個網所教o既係 榛子曲奇, 不過我無榛子, 只係有杏仁, 所以就轉用杏仁粉o黎做. 整完之後下試試先, 食落去都會食到少少好細粒杏仁粒粒. 由於我d曲奇模唔係好大個, 所以唔止個綱度話整o左三十磈, 我整o左over 三十磈o架, 不過確實有幾多磈我就無數到啦.

當床訓!!!


阿寶: 呢度好舒服呀.....

阿寶: 唔好影我啦~~

GRACE: 凍呀, 俾張被你呀.
阿寶: 唔該哂!!

阿寶呢排越o黎越多花神, 依家唔肯去個猫兜度飲水, 一定要我地拎個兜放o係洗手盤度先肯飲. 真係俾佢激死. 依家都跳上個洗手志盤度當床訓....唉....濕麻... 之前佢要跳上個洗手盤度, 都要先跳上個坐廁然後先去到個洗水盤, 但係依家唔使啦..o係地下一跳就跳到去佢呢張[床]度. 試問我又點能夠廿四小時睇住你呢..你再係咁你就一身都係濕疹o架啦...

2007年11月22日

又去佛堂食齋

今日阿媽阿爸都去o左佛堂幫手, 其實呢幾日佛堂都有大o既法事做, 所以都好熱鬧, 而呢幾日都有齋食, 所以今日約o左家姐同佢 d朋友去o左佛堂食齋, 一去到佛堂都已經見到好多人o係度幫手,我阿爸阿媽當然係其中o既兩個啦!! 不過一入到去, 就叫我去食齋, 由於我家姐同佢 d 朋友比我早戈到佛堂, 所以入到去已經見佢地o係度食緊齋啦!! 今日o既齋菜依然係有好多款式, 不過我唔記得影呀, 我諗如果我係有影到, 你到見到都會話多呀. 其實家姐O既朋友都係第一次O黎佛堂同食齋, 佢地都話 D 齋好食呀. 我都食O左好多呀. 之後食飽O左我地都走啦. 而我就同我家姐再出O左去元朗行. 元朗都有好多平O野O架, 我地入O左去一間鋪頭, 裡面都係買D 家居用品, 俾我見到上次O係花園街見到果個蛋糕模, 不過我都唔係好記得O係花園街見到幾多錢,但係上次無買已經有 D 後門, 所以今日再見到就急不及待即刻買O左佢呀!! 點知行到埋收銀, 個阿姐話有八折呀, 哈...真係開心, 原價$37, 依家就29.6咋, 無啦啦平O左!!! 之後就繼續行, 家姐就話去買勝利牛丸, 佢話好好食, 由於我唔食牛, 所以同佢去買咋, 跟住又去O左一間上海鋪九菜餅, 蔥油餅, 不過係買返屋企食O架!!! 我拎到返屋企都仲熱O架, 好好味呀!!! 下次再出元朗都要買O黎食. 買完O野對腳都攰攰地, 我同家姐就坐車返屋企啦....

我就係買O左呢個蛋糕模啦!!!

2007年11月21日

薏米腐竹蛋糖水


早幾日我阿爸話想食薏米, 於是今日就走o左去買材料整o左呢個薏米腐竹蛋糖水, 事關又易整, 又好味, 依家天氣咁乾燥, 最好就係食返 d糖水潤下啦!!!
預備定d材料,包括洋薏米,白果,腐竹,雞蛋,冰糠,清水.
(唔好意思, 唔記得寫返 D 材料O既重量. 所以俾唔到詳細O既重量呀)

1)先將d洋薏米洗乾淨之後用水浸一陣.
2) 白果去除硬殼將白果放入滾水中浸一會去除表面的E, 再去除白果裡面的一條芯.(因為果條芯有苦味)
3) 將清水煲滾, 將洋薏米, 白果及整碎O左O既腐竹加入滾水中煲.
4) 用另一個煲將雞蛋烚熟.
5)腐竹煲到好似豆漿狀而洋薏米亦都軟身就可以加入冰糖, 待冰糖溶哂之後再加入已烚好O既雞蛋, 亦都可以加入一隻雞蛋做蛋花.
完成, 食得.

2007年11月18日

肥姐你要加油呀!


今日約o左好友食晏, 其實都係簡簡單單走o左去食米線, 之後好友要要俾 d 野佢個細佬同弟嫂, 所以就約o左o係麥記等, 我地坐低無耐就見到佢地, 我都有一排無見過好友呢個侄仔, 今日見到佢一樣咁我好傾, 因為呢個細佬真係好多o野講o架!!! 哈... 佢得五歲咋, 不過好鬼健談o架!!! 佢就係因為把口叻, 所以都攞過幾次講故事o既奬, 哈... 大家可想而知佢幾咁口齒伶俐呀!!!! 之後好友將d o野俾o左佢細佬同弟婦之後, 我地都走人啦!!! 再係咁e逛多一陣就走人啦!!!

尋日大家有冇睇無線呀?? 我睇見肥姐, 雖然見到佢仍然可以好勇敢咁同大家見面, 但係相信佢身體係好弱, 要對抗病魔唔係一件容易o既事, 希望佢可以堅強咁面對, 亦希望佢可以戰勝病魔!!! 加油呀姐姐!!好多人持你o架!!!

2007年11月17日

屯門咖哩

今日約o左好友食飯, 但係屯門區都食得七七, 八八, 都唔知食乜好,後尾諗諗下記得上次我家姐去過置樂果邊o既一間[屯門咖哩]食過話幾好味, 所以就去試試啦. 可能我地比較早去到, 入到去間鋪頭都未有客, 哈...所以你話我地幾早呀. 一坐低就有位印度o既太太用廣東話同我地落單, 佢講得好好o架!!! 我地叫o左一個二人餐, 估唔到個餐都幾多o野食, 兩個人食就多o左少少, 不過味道都OK, 價錢亦唔貴, 算係咁啦!!! 我覺得最好食都係果碟炸物, 其實我唔知係乜O野O黎, 但係就好味!!! 有機會都叫 D FRIEND O黎試試.
去到同走都唔記得影間鋪既門口樣, 只係影O左間鋪頭入面O既環境.
我地叫果個餐.
呢碟炸物, 我真係唔知入面係 D 乜, 不過幾好味O架.
餐湯, 都係唔知乜O黎, 不過就有D菜碎O係入面囉. 味道OK.

串燒雞件. (我初初仲以為會係一串串咁上碟.
咖哩雞. 其實另外仲有一碟咖哩羊, 不過兩碟都差不多, 所以廢時影.

薄餅OK啦. 有四件O架, 用O黎點咖哩, 好味.
炒清菜, 無咪等持別, 不過d菜都好爽口.

2007年11月15日

好平呀!!

今日我家姐打電話俾我話佢會出花園街行下, 我都好耐無出街, 所以就約埋一齊出去逛下啦!!! 花園街 d o野真係好平, 行o左無耐就見到有一檔係賣d家居用品, 俾我見到呢套唧咀呀, 一套十二個, 你地估下幾多錢, 真係平到你唔信..............

係十五蚊呀!!!! 實在太平啦..........................

另外又入o左去一間鋪頭度買o左呢套杯, 你又估下幾多錢??!!
九蚊咋. 哈....雖然我都知一定唔係原裝貨, 但係以咁o既價錢....你想點呀!!! 不過真係幾靚o架!! 可以話係又平又靚!!! 之後我地就再行o左去金魚街, 亦即係通菜街度睇金魚, 不過我就無買金魚, 買o左接吻魚同埋兩款唔同色o既麗麗, 本來想買神仙魚, 不過最後都係無買到.



你睇下幾多魚, 一包包, 鍾意邊包就揀邊包啦.


之後行到差不多五點都走人啦...因為都攰攰地啦...而我家姐都要返屋企啦!!!下次再去花園街可又係幾個月之後啦~~

2007年11月14日

阿寶好似...[屎]o左咁!! 哈..



我都知你好睇訓, 但係你使唔使訓到條脷都走埋出O黎啦..唔知O既人仲以為你死哂呀...快 D 收返埋你條脷啦!!!

呢張就好D, 起碼識得用隻手遮住個口, 訓到條脷都抻埋出O黎都無人知啦.醒目呀!!

2007年11月11日

阿爸阿媽返喇!!

阿爸阿媽足足返O左鄉下成個星期, 今日終於都返屋企, 呢幾日佢都好辛苦啦!!! 所以我緊係要煲個靚湯, 煮返幾味俾佢地食啦!!!! 雖然個賣相唔係咁靚, 但係味道都幾好O架!!! 哈... 我阿爸阿媽都話好味!! 我自己都食O左好多!!!

霸皇花煲豬[爭]湯

呢條係班, 不過我唔知佢係乜o野班.

麻婆豆腐

咖哩薯仔雞亦

沙炒波菜

阿寶你可唔可以乖d呀.


乖o既時候好地地...失驚無神就會咬死你!!

呢幾日阿寶好似發o左癲咁!!!! 成日跑o黎跑去, 你跑我都唔會怪你, 但係你都唔好成日無啦啦走o黎咬我呀!!! 有時諗住摸下佢, 點知一模佢就咬埋o黎, 仲有用佢果兩隻手攬住我隻手係咁咬! 痛死我啦!!!! 雖然不至咬到出血, 但係我隻手都俾佢咬到花哂!! 我實在忍唔住啦!!!! 唔打下佢都唔得!!! 不過打又有乜用呀!!! 轉頭佢又咬我啦!!! 我實在對佢無哂符, 仲有呢幾日都聽到阿寶無啦啦係度叫, 果種叫法好似係發情果 d 叫法, 佢都大個仔啦....... 唔知係咪因為咁o既原因, 佢 o 情緒好高漲, 脾氣又唔好, 要你o既時候就要你抱, 唔鍾意o既時候就掂下都咬人, 好難捉模呀!!!!

阿寶寶大佬, 你乖d 啦......我雙手已經好受怪o架啦.. 你放我一馬啦..唔好再失驚無神走埋o黎咬我啦!!!! 唔係我真係好唔好老皮o架...到時又打你你唔好怪我呀!!!